യു.പിയിൽ ഓക്​സിജനില്ലെന്ന്​ കേന്ദ്രമന്ത്രി; യോഗി ആദിത്യനാഥിന്​ കത്തെഴുതി ​

ലഖ്​നോ: ഉത്തർപ്രദേശിൽ ഓക്​സിജൻ ക്ഷാമമുൾപ്പെടെ കോവിഡ്​ പ്രതിരോധ പ്രവർത്തനങ്ങളിൽ രൂക്ഷ വിമർശനവുമായി മുഖ്യമന്ത്രി യോഗി ആദിത്യനാഥിന്​ കേന്ദ്രമന്ത്രി സന്തോഷ്​ ഗാങ്​വാറിന്‍റെ കത്ത്​. ഓക്​സിജൻ ക്ഷാമം, വെന്‍റിലേറ്ററുകളുടെയും മറ്റു മെഡിക്കൽ ഉപകരണങ്ങളുടെയും പൂഴ്​ത്തിവെപ്പ്​ തുടങ്ങിയവ കത്തിൽ സൂചിപ്പിച്ചു. തലസ്​ഥാന നഗരത്തിൽനിന്ന്​ 250 കിലോമീറ്റർ അകലെയുള്ള സന്തോഷിന്‍റെ മണ്ഡലമായ ബറേലിയിൽ സ്​ഥിതി ഗുരുതരമാണെന്നും കത്തിൽ ചൂണ്ടിക്കാട്ടി.

ആശുപത്രികളിൽ ഓക്​സിജൻ ക്ഷാമമുണ്ടെന്ന്​ പ്രചരിപ്പിക്കുന്നവർക്കെതിരെ കേസെടുത്ത്​ നടപടി സ്വീകരിക്കുമെന്ന്​ യോഗി ആദിത്യനാഥ്​ പ്രസ്​താവനയിറക്കിയതിന്​ പിന്നാലെയാണ്​ മന്ത്രിയുടെ കത്ത്​.

സന്തോഷ്​ ഗാങ്​വാറിന്‍റെ ലോക്​സഭ മണ്ഡലമാണ്​ ബറേലി. ബറേലിയിൽ ഒാക്​സിജൻ ക്ഷാമമുണ്ടെന്ന്​ വിവരിച്ച അദ്ദേഹം അവിടെ വെന്‍റിലേറ്ററുകളും മറ്റു മെഡിക്കൽ ഉപകരണങ്ങളും കരിഞ്ചന്തയിൽ വിൽക്കുകയാണെന്നും ആരോപിച്ചു. ആരോഗ്യ വകുപ്പ്​ അധികൃതർ ​േഫാൺ കോളുകൾ പോല​ും എടുക്കുന്നില്ല, കോവിഡ്​ രോഗികളെ ബുദ്ധിമുട്ടിക്കുകയാണെന്നും അദ്ദേഹം കത്തിൽ പറയുന്നു.

ബറേലിയി​െല ആശുപത്രികളിൽ ഓക്​സിജൻ പ്ലാൻറ്​ സ്​ഥാപിക്കണമെന്ന്​ യോഗിക്ക്​ നിർദേശം നൽകി. കോവിഡ്​ പ്രതിരോധ പ്രവർത്തനങ്ങൾ സംബന്ധിച്ച്​ ജനങ്ങളിൽനിന്ന്​ നിരവധി പരാതികൾ ലഭിച്ചിരുന്നു, അത്​ മുഖ്യമന്ത്രിയെ അറിയിക്കുക മാത്രമാണ്​ ചെയ്​തതെന്നായിരുന്നു കത്തിനെക്കുറിച്ച്​ സന്തോഷിന്‍റെ പ്രതികരണം.

സംസ്​ഥാനത്ത്​ ഓക്​സിജൻ ക്ഷാമമില്ലെന്ന്​ യോഗി ആദിത്യനാഥ്​ പ്രസ്​താവിച്ചിരുന്നു. സംസ്​ഥാനത്ത്​ സർക്കാർ, സ്വകാര്യ ആശുപ​ത്രികളിൽ ​ഓക്​സിജൻ ക്ഷാമമി​ല്ല. എല്ലാ കോവിഡ്​ രോഗികൾക്കും ഓക്​സിജൻ സൗകര്യം വേണ്ട. അതിനാൽ തന്നെ സംസ്​ഥാനത്ത്​ ഓക്​സിജൻ ക്ഷാമമുണ്ടെന്ന്​ പ്രചരിപ്പിക്കുന്നവർക്കെതിരെ കേസെടുക്കുമെന്നായിരുന്നു യോഗി ആദിത്യനാഥ്​ നേരത്തേ വ്യക്തമാക്കിയിരുന്നത്​. യോഗിയുടെ വാദം തെറ്റാണെന്ന്​ ചൂണ്ടിക്കാണിക്കുന്നതായി കേന്ദ്രമന്ത്രിയുടെ കത്ത്​.