നിങ്ങൾക്ക് ഭരണഘടന അലർജിയാണ്, ഒരിക്കലെങ്കിലും അത് വായിക്കുക -അമിത്ഷായോട് ഉവൈസി

ന്യൂഡൽഹി: രാജ്യത്താകമാനം പൗരത്വ രജിസ്റ്റർ നടപ്പാക്കുമെന്ന ആഭ്യന്തര മന്ത്രി അമിത് ഷായുടെ പ്രസ്താവനക്കെതിരെ രൂക്ഷ വിമർശനവുമായി എ.ഐ.എം.ഐ.എം അധ്യക്ഷൻ അസദുദ്ദീൻ ഉവൈസി. അമിത് ഷാക്ക് ഭരണഘടന അലർജിയാണെന്നാണ് ഉവൈസിയുടെ വിമർശനം.

ആഭ്യന്തര മന്ത്രിയെ സംബന്ധിച്ചിടത്തോളം ദേശീയ പൗരത്വ രജിസ്റ്ററിനെ പേടിക്കേണ്ടത് മുസ്​ലിംകൾ മാത്രമാണ്. അമിത് ഷാ, നിങ്ങൾക്ക് ഭരണഘടന അലർജിയാണെന്ന് എനിക്കറിയാം. പക്ഷേ ഒരു തവണയെങ്കിലും അത് വായിക്കുക. പൗരത്വത്തിന്‍റെ അടിസ്ഥാനം മതമല്ല, അത് ഭരണഘടനാവിരുദ്ധവും നിയമവിരുദ്ധവുമാണ് -ഉവൈസി പറഞ്ഞു. ട്വിറ്ററിലൂടെയായിരുന്നു ഉവൈസിയുടെ വിമർശനം.

അനധികൃത കുടിയേറ്റക്കാരിൽ ഒരാളെ പോലും രാജ്യത്ത് കഴിയാൻ അനുവദിക്കില്ലെന്നും എന്നാൽ അഭയാർഥികളായ ഹിന്ദു, സിഖ്, ബുദ്ധ, ക്രിസ്ത്യൻ വിഭാഗങ്ങളെ ബലം പ്രയോഗിച്ച് പുറത്താക്കില്ലെന്നുമാണ് അമിത് ഷാ പറഞ്ഞത്.

രാജ്യത്താകമാനം പൗരത്വ രജിസ്റ്റർ നടപ്പാക്കും. ഈ വിഷയത്തിലെ കുപ്രചരണങ്ങളെ വിശ്വസിക്കരുത്. പൗരത്വ ഭേദഗതി ബിൽ അഭയാർഥികളായ ഹിന്ദു, സിഖ്, ബുദ്ധ, ക്രിസ്ത്യൻ വിഭാഗങ്ങളുടെ പൗരത്വം ഉറപ്പാക്കും. ഇതാണ് ബി.ജെ.പിയുടെ വാഗ്ദാനമെന്നും കൊൽക്കത്തയിലെ ബി.ജെ.പി റാലിയിൽ അമിത് ഷാ പറഞ്ഞിരുന്നു.