കോവിഡ്​ രോഗികളുടെ എണ്ണം 60,000 കടന്നു; അഞ്ച്​ മാസത്തെ ഉയർന്ന നിരക്ക്​

ന്യൂഡൽഹി: രാജ്യത്ത്​ 24 മണിക്കൂറിനിടെ 62,258 പേർക്ക്​ കൂടി കോവിഡ്​ സ്ഥിരീകരിച്ചു. ഒക്​ടോബറിന്​ ശേഷം ഇത്​ ആദ്യമായാണ്​ കോവിഡ്​ രോഗികളുടെ എണ്ണം ഇത്രയും ഉയരുന്നത്​. ഇതോടെ രാജ്യത്തെ കോവിഡ്​ രോഗികളുടെ ആകെ എണ്ണം 1.19 കോടിയായി ഉയർന്നു.

4,52,647 പേരാണ്​ നിലവിൽ ചികിത്സയിലുള്ളത്​. 291 പേർ കഴിഞ്ഞ ദിവസം കോവിഡ്​ ബാധിച്ച്​ മരിച്ചു. 1,61,240 മരണമാണ്​ ഇതുവരെ റിപ്പോർട്ട്​ ചെയ്​തത്​. 30,386 പേർക്ക്​ രോഗമുക്​തിയുണ്ടായി. കഴിഞ്ഞ വർഷം ജനുവരി 30നാണ്​ ഇന്ത്യയിൽ ആദ്യമായി കോവിഡ്​ സ്ഥിരീകരിച്ചത്​. ബ്രസീലും യു.എസും കഴിഞ്ഞാൽ ലോകത്ത്​ കോവിഡ്​ ​രൂക്ഷമായി തുടരുന്ന രാജ്യങ്ങളിലൊന്ന്​ ഇന്ത്യയാണ്​.

മഹാരാഷ്​ട്രയിലാണ്​ രാജ്യത്ത്​ കോവിഡ്​ രോഗികളിൽ ഭൂരിപക്ഷവും. ഏകദേശം 30,000ത്തോളം പേർക്ക്​ മഹാരാഷ്​ട്രയിൽ പ്രതിദിനം കോവിഡ്​ സ്ഥിരീകരിക്കുന്നുണ്ട്​. ഞായറാഴ്ച മുതൽ സംസ്ഥാനത്ത്​ രാത്രി കർഫ്യൂ ഏർപ്പെടുത്തിയിട്ടുണ്ട്​.