ഇന്ത്യയിൽ 24 മണിക്കൂറിനുള്ളിൽ 5242 കോവിഡ്​ കേസുകൾ; മരണം 3000 കടന്നു

ന്യൂഡൽഹി: ഇന്ത്യയിൽ പ്രതിദിനം റിപ്പോർട്ട്​ ചെയ്യപ്പെട്ട കോവിഡ്​ കേസുകളിൽ റെക്കോർഡ്​ വർധന. രാജ്യത്ത്​ കഴിഞ്ഞ 24  മണിക്കൂറിനുള്ളിൽ 5242 പുതിയ കോവിഡ്​ കേസുകളാണ്​  റിപ്പോർട്ട്​ ചെയ്​തത്​. ഇതോടെ കോവിഡ്​ സ്ഥിരീകരിച്ചവരുടെ എണ്ണം 96,169 ആയതായി കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. 

റിപ്പോർട്ട്​  ചെയ്യപ്പെടുന്ന കോവിഡ് മരണത്തിലും ക്രമാതീതമായ വർധനവാണുണ്ടായത്​. 24 മണിക്കൂറിനുള്ളിൽ  157 മരണങ്ങളാണ്​ റിപ്പോർട്ട് ചെയ്​തത്​. ഇതോടെ രാജ്യത്ത് കോവിഡ്​ വൈറസ്​ ബാധിച്ച്​ മരിച്ചവരുടെ എണ്ണം 3029 ആയി ഉയർന്നു. രാജ്യത്ത് 36,824 ​േപർ രോഗമുക്തി നേടിയെന്ന്​ കേന്ദ്ര ആരോഗ്യമന്ത്രാലയം അവകാശപ്പെടുന്നു. 56,316 പേർ ചികിത്സയിലുണ്ട്​. 

ഏറ്റവും കൂടുതൽ കോവിഡ്​ കേസുകളുള്ള മഹാരാഷ്ട്രയിൽ വൈറസ്​ ബാധിതരുടെ എണ്ണം 33,053 ആയി ഉയർന്നു. കഴിഞ്ഞ 24 മണിക്കൂറിനുള്ളിൽ 2347 പേർക്കാണ്​ വൈറസ്​ ബാധ​ സ്ഥിരീകരിച്ചത്​. ​ഞായറാഴ്​ച 63  പേർ  കൂടി മരിച്ചതോടെ മരണസംഖ്യ 1198 ആയി ഉയർന്നു. 

ഗുജറാത്തിൽ ഞായറാഴ്​ച 34 പേരാണ്​ മരിച്ചത്​. ഇതോടെ സംസ്ഥാനത്തെ മരണസംഖ്യ 659 ആയി. ഇതുവരെ 11379 പേർക്കാണ്​ കോവിഡ്​ സ്ഥിരീകരിച്ചിട്ടുള്ളത്​. ഇതുവരെ 4499 പേർക്ക്​ അസുഖം ഭേദമായി.  

ഡൽഹിയിൽ കഴിഞ്ഞ ദിവസം 31 കോവിഡ്​ മരണങ്ങൾ റിപ്പോർട്ട്​ ചെയ്​തത്​. ഇതോടെ മരണസംഖ്യ 160 ആയി. കോവിഡ്​ ബാധിതരുടെ എണ്ണം 10,054 ആയി ഉയർന്നു. 4485 പേർ രോഗമുക്തി നേടി. 

തമിഴ്​നാട്ടി​ലെ കോയ​േമ്പട്​ മാർക്കറ്റിൽ കോവിഡ്​ വ്യാപിച്ചതോടെ വൈറസ്​ ബാധിതരുടെ എണ്ണം 11,224 ആയി. 78 മരണങ്ങളും റിപ്പോർട്ട്​ ചെയ്​തു. 

രാജസ്ഥാൻ 5409 കോവിഡ്​ ബാധിതരും 131 മരണവും റിപ്പോർട്ട്​ ചെയ്​തു. മധ്യപ്രദേശ്​ 4,977 (248), ഉത്തർപ്രദേശ്​ 4,259 (104), പശ്ചിമബംഗാൾ 2,677 (238) എന്നിങ്ങനെയാണ്​ കണക്കുകൾ. കേരളത്തിൽ ക​ഴിഞ്ഞ ദിവസം 14 പേർക്കാണ്​ കോവിഡ്​ സ്ഥിരീകരിച്ചത്​. നിലവിൽ 100 ഓളം പേർ ചികിത്സയിലുണ്ട്​.