തിമിർത്തുപെയ്​ത്​​ മഴ; മുംബൈയിൽ മരണം 136, ലക്ഷത്തോളം ​േപരെ ഒഴിപ്പിച്ചു

മുംബൈ: ദിവസങ്ങളായി തിമിർത്തുപെയ്യുന്ന കനത്ത മഴ മുംബൈയിലും അയൽജില്ലകളിലും വിതക്കുന്നത്​ മഹാനാശം. ഇതുവരെയും 136 പേരുടെ മരണം സ്​ഥിരീകരിച്ച മെട്രോപോളിറ്റൻ നഗരത്തിൽ ആൾനാശം കൂടുമെന്ന ആശങ്ക നിലനിൽക്കുകയാണ്​. കഴിഞ്ഞ ദിവസം തീരദേശമായ റായ്​ഗഡിലുണ്ടായ മണ്ണിടിച്ചിലിൽ മാത്രം 36 പേർ മരിച്ചിരുന്നു. 50 ഓളം പേർക്കായി തിരച്ചിൽ തുടരുകയാണ്​. 32 വീടുകളാണ്​ ഇവിടെ മണ്ണിനടിയിലായത്​.

കൊങ്കൺ മേഖലയിലെ ഏഴു ജില്ലകളി​ൽ കനത്ത മഴ തുടരുകയാണ്​. ഇവിടെ മണ്ണിടിച്ചിലും പ്രളയവും മൂലം ആയിരങ്ങളെ മാറ്റിപ്പാർപ്പിച്ചിട്ടുണ്ട്​. 24 മണിക്കൂറിനിടെ മഹാബലേശ്വറിൽ 480 മില്ലീമീറ്റർ മഴയാണ്​ രേഖപ്പെടുത്തിയത്​. സമീപകാല ചരിത്രത്തിലെ ഏറ്റവും കൂടിയ കണക്കാണിതെന്ന്​ കാലാവസ്​ഥ വിഭാഗം അറിയിച്ചു. 1977 ജൂലൈ ഏഴിന്​ രേഖപ്പെടുത്തിയ 439.8 ആയിരുന്നു ഇതുവരെയും സംസ്​ഥാനത്ത്​ ഏറ്റവും കൂടിയ മഴ. ദിവസങ്ങൾക്കിടെ ഇവിടെ 1993.9 മില്ലീമീറ്റർ പെയ്​തതായാണ്​ കണക്ക്​. ഒരു വർഷം മൊത്തമായി പെയ്യുന്ന മഴക്കണക്കാണിത്​.

മഹാരാഷ്​ട്രയുടെ പടിഞ്ഞാറൻ മേഖലയിലെ സത്താറയിൽ പ്രളയം നിരവധി ​ജീവനെടുത്തതായി റിപ്പോർട്ടുകൾ പറയുന്നു​. ഇവിടെ മാത്രം 27 പേരുടെ മരണം സ്​ഥിരീകരിച്ചതായി പൊലീസ്​ അറിയിച്ചു. ഗോണ്ടിയ, ചന്ദ്രപൂർ, താനെ, പാൽഗഡ്​, രത്​നഗിരി, സാംഗ്ലി എന്നിവയാണ് കൂടുതൽ നാശം റിപ്പോർട്ടുചെയ്യപ്പെട്ട മറ്റു ജില്ലകൾ. കൊൽഹാപൂരിൽ മാത്രം 40,000 ലേറെ പേരെ മാറ്റിപ്പാർപ്പിച്ചിട്ടുണ്ട്​. ഇവിടെ എട്ട്​ നേപാളി തൊഴിലാളികളുൾ​െപടെ 11 പേരുമായി പോയ ബസ്​ മലവെള്ളപ്പാച്ചിലിൽ ഒഴുകിപ്പോയെങ്കിലും യാത്രക്കാരെ അദ്​ഭുതകരമായി രക്ഷപ്പെടുത്തി. പാൽഗഢിൽ മൂന്നു പേർ മരിച്ചിട്ടുണ്ട്​.

സംസ്​ഥാനത്ത്​ മരിച്ചവരുടെ കുടുംബങ്ങൾക്ക്​ സർക്കാർ അഞ്ചു ലക്ഷം രൂപ നഷ്​ടപരിഹാരം പ്രഖ്യാപിച്ചു​.

മുംബൈയിൽ പ്രളയം തുടരുന്ന സാഹചര്യത്തിൽ നിരവധി ട്രെയിൻ സർവീസുകൾ റദ്ദാക്കി. മണ്ണിടിച്ചിലിൽ ട്രാക്കുകൾ കേടുവന്നിരുന്നു. കൊങ്കണിൽ ട്രെയിൻ ഗതാഗതം മുടങ്ങിയതോടെ ആറായിരം യാത്രക്കാർ കുടുങ്ങിയതായും റിപ്പോർട്ടുകൾ പറയുന്നു. ട്രെയിനുകൾ സുരക്ഷിത കേന്ദ്രങ്ങളിൽ നിർത്തിയിട്ടതായി കൊങ്കൺ അധികൃതർ വ്യക്​തമാക്കി.

അതിനിടെ, മഴയിൽ ജലനിരപ്പ്​ കുത്തനെ ഉയർന്ന ഖഡക്​വാസ്​ല അണക്കെട്ട്​ തുറന്നുവിട്ടു. പരിസര പ്രദേശങ്ങളിൽ പ്രളയ സാധ്യത കണക്കിലെടുത്ത്​ പുണെ മുനിസിപ്പൽ അധികൃതർ ജനങ്ങൾക്ക്​ മുന്നറിയിപ്പ്​ നൽകി. മുംബൈ നഗരത്തിന്​ ജലം നൽകിയിരുന്ന തടാകങ്ങളൊക്കെയും ജലം ഉയർന്ന്​ പ്രളയമുനമ്പിലാണ്​.