വെങ്കയ്യനായിഡുവിനെതിരെ പ്രതിഷേധ ഹരജിയുമായി പ്രതിപക്ഷം

ന്യൂഡൽഹി: ഉപരാഷ്​ട്രപതി വെങ്കയ്യനായിഡു പക്ഷപാതപരമായി പെരുമാറുന്നുവെന്ന്​ ആരോപിച്ച്​ കോൺഗ്രസി​​​െൻറ നേതൃത്വത്തിൽ പ്രതിപക്ഷ പാർട്ടികളുടെ ഭീമഹരജി. രാജ്യസഭാധ്യക്ഷനായ വെങ്കയ്യനായിഡു സഭയിൽ ഭരണപക്ഷ പാർട്ടിക്ക്​ അനുകൂലമായി പെരുമാറുന്നുവെന്നാണ്​ പ്രതിപക്ഷത്തി​​​െൻറ പരാതി. 

ആദ്യമായാണ്​ രാജ്യസഭാ അധ്യക്ഷനെതിരെ പ്രതിപക്ഷ പാർട്ടികൾ സംയുക്തമായി ഹരജി നൽകാനൊരുങ്ങുന്നത്​. 
ലോക്​സഭാധ്യക്ഷൻ സുമിത്ര മഹാജനും ഹരജി നൽകാൻ പ്രതിപക്ഷം തീരുമാനിച്ചിട്ടുണ്ട്​. കോൺഗ്രസ്​ നേതാക്കൾക്കു പുറമെ, തൃണമൂൽ കോൺഗ്രസ്,  സമാജ്​വാദി പാർട്ടി, നാഷണലിസ്​റ്റ്​ കോൺഗ്രസ്​ പാർട്ടി നേതാക്കളും ഹരജിയിൽ ഒപ്പുവെച്ചിട്ടുണ്ട്​.

രാജ്യസഭ ടിവി ചാനൽ പ്രതിപക്ഷ പാർട്ടികളെ ഇകഴ്​ത്തി കാണിക്കുകയും ഭരണപക്ഷ പാർട്ടിയുടെ നിലപാടുകൾ പ്രചരിപ്പിക്കാൻ ശ്രമിക്കുകയും ചെയ്യുന്നുവെന്നും ആരോപണമുണ്ട്​. രാജ്യസഭാ വെബ്​സൈറ്റിൽ നിന്നും പ്രതിപക്ഷത്തി​​​െൻറ ചോദ്യവും അതിന്​ സർക്കാർ നൽകിയ മറുപടിയും ഒഴിവാക്കി. ചോദ്യങ്ങൾ നോട്ട്​ നിരോധനത്തെ കുറിച്ചും സഹകരണബാങ്കിൽ ബി.ജെ.പി പ്രസിഡൻറ്​ അമിത്​ ഷായുടെ നിക്ഷേപത്തെ കുറിച്ചുമായിരുന്നു. പിന്നീട്​ മാധ്യമങ്ങൾ ഇത്​ ചൂണ്ടിക്കാട്ടിയ​​പ്പോൾ സൈറ്റിൽ തിരിച്ചെത്തിയെന്നും കോൺഗ്രസ്​ ചുണ്ടിക്കാട്ടുന്നു.