കോൺഗ്രസ്​ ജനങ്ങളെ ഭിന്നിപ്പിച്ച്​ ഭരിക്കുന്നു, അവർ ജയിച്ചാൽ നുഴഞ്ഞുകയറ്റക്കാർക്ക്​ വാതിലുകൾ തുറക്കും - അമിത്​ ഷാ

നൽബരി(അസം): കോൺഗ്രസ്​- എ.ഐ.യു.ഡി.എഫ്​ സഖ്യം അസമിൽ അധികാരത്തിൽ വന്നാൽ അയൽരാജ്യങ്ങളിൽ നിന്നുള്ള നുഴഞ്ഞുകയറ്റക്കാർക്ക്​ വാതിലുകൾ തുറന്നുകൊടുക്കുമെന്ന്​ കേന്ദ്ര ആഭ്യന്തരമന്ത്രി അമിത്​ ഷാ. സംസ്ഥാനത്തെ കോൺഗ്രസ് ഭരണം രക്തച്ചൊരിച്ചിൽ മാത്രമാണ് നടത്തിയതെന്നും അതിൽ ആയിരക്കണക്കിന് യുവാക്കൾക്ക് ജീവൻ നഷ്ടപ്പെ​െടന്നെും ഷാ പറഞ്ഞു. മാർച്ച്​-ഏപ്രിൽ മാസങ്ങളിൽ നടക്കാനിരിക്കുന്ന അസംബ്ലി തെരഞ്ഞെടുപ്പിന്​ മുന്നോടിയായുള്ള റാലിയിൽ സംസാരിക്കുകയായിരുന്നു ഷാ.

ബ്രിട്ടീഷുകാരു​ടെ ഭിന്നിപ്പിച്ച്​ ഭരിക്കുക എന്ന നയമാണ്​ കോൺഗ്രസ്​ നടപ്പാക്കുന്നത്​. സംസ്​ഥാനത്തെ ജനങ്ങൾക്കിടയിൽ അവർ ഭിന്നത സൃഷ്​ടിച്ചതായും അമിത്​ ഷാ പറഞ്ഞു. കേരളത്തിൽ മുസ്​ലിം ലീഗുമായും അസമിൽ എ.ഐ.യു.ഡി.എഫുമായും സഖ്യമുണ്ടാക്കിയ കോൺഗ്രസ്​ ബി.ജെ.പിയുടെ മേൽ വർഗീയത ആരോപിക്കുന്നുവെന്നും ഷാ പറഞ്ഞു.