നോട്ട്​ അസാധുവാക്കൽ: ​മോദിയെ പ്രംശസിച്ച്​ മുകേഷ്​ അംബാനി

മുംബൈ: നോട്ട്​ പിൻവലിക്കൽ തീരുമാനമെടുത്ത ​പ്രധാനമന്ത്രി നരേന്ദ്രമോദിയെ അഭിനന്ദിച്ച്​ റിലയന്‍സ് ചെയര്‍മാന്‍ മുകേഷ്​ അംബാനി.പഴയ നോട്ടുകൾ പിൻവലിക്കുന്നത്​ സംബന്ധിച്ച്​ ചരിത്രപരമായ തീരുമാനമെടുത്ത പ്രധാനമന്ത്രി അഭിനന്ദനമർഹിക്കുന്നു. നോട്ട്​ പിൻവലിക്കലിലൂടെ നോട്ടില്ലാ സമ്പദ്​ വ്യവസ്ഥയാണ്​ അദ്ദേഹം പരിചയപ്പെടുത്തുന്നതെന്നും മുകേഷ്​ അംബാനി പറഞ്ഞു.

എല്ലാവരുടെ കയ്യിലും ഡിജിറ്റൽ എ.ടി.എമ്മാണുള്ളത്​. ഡിജിറ്റൽ സംവിധാനത്തിലൂടെ സാധ്യമാകുന്ന ഇടപാടുകൾ സാമ്പത്തിക വളർച്ചക്ക്​ സഹായകമാണ്​. അഭൂതപൂര്‍വ്വമായ സുതാര്യതയും ഉത്തരവാദിത്വവുമാണ്​ നൽകുന്നത്​. ഡിജിറ്റൽ സംവിധാന സാധ്യതകൾ ഉപയോഗപ്പെടുത്തുന്നതിനുള്ള ഏറ്റവും നല്ല അവസരമാണ്​ നോട്ട്​ പിൻവലിക്കലിലൂടെ രാജ്യത്തിന്​ കൈവന്നിരിക്കുന്നത്​. നോട്ടില്ലാ സമ്പദ്​ വ്യവസ്ഥയെയും ഡിജിറ്റൽ ഇടപാടുകളെയും സ്വാഗതം ചെയ്​തുകൊണ്ടുള്ള പ്രധാനമന്ത്രിയുടെ നടപടി ധീരമാണെന്നും മുകേഷ്​ അംബാനി പറഞ്ഞു.

റിലയന്‍സ് ജിയോ ഉപഭോക്താക്കൾക്കുള്ള സൗജന്യ സേവനം ‘ഹാപ്പി ന്യൂ ഇയര്‍ ഓഫര്‍' എന്ന പേരിൽ മാർച്ച്​ 31 വരെ നീട്ടിയത്​ സംബന്ധിച്ച പ്രഖ്യാപനത്തിനായി ചേർന്ന വാർത്താ സമ്മേളനത്തിലാണ്​ മുകേഷ്​ അംബാനി മോദിയെ പ്രശംസിച്ചത്​.