'ഏറ്റവും ആവേശകരമായ ഫുട്ബോൾ മത്സരം'; മെസ്സിയുടെ വിജയത്തിൽ ദശലക്ഷക്കണക്കിന് ഇന്ത്യൻ ആരാധകർ ആഹ്ലാദിക്കുന്നു -മോദി

ന്യൂഡൽഹി: ഫിഫ ലോകകപ്പ് നേടിയ അർജന്റീനയെ അഭിനന്ദിച്ച് പ്രധാനമന്ത്രി നരേന്ദ്ര മോദി. ഫ്രാൻസും അർജന്റീനയും തമ്മിലുള്ള ലോകകപ്പ് ഫൈനൽ ഏറ്റവും ആവേശകരമായ ഫുട്ബോൾ മത്സരങ്ങളിലൊന്നായി ഓർമ്മിക്കപ്പെടുമെന്ന് മോദി പറഞ്ഞു. പെനാൽറ്റി ഷൂട്ടൗട്ടിൽ ഫ്രാൻസിനെ 4-2ന് പരാജയപ്പെടുത്തി അർജന്റീന ലോകകപ്പ് ജേതാക്കളായി.

അർജന്റീന ക്യാപ്റ്റൻ ലയണൽ മെസ്സി രണ്ടു ഗോളുകളും ഫ്രാൻസ് സ്‌ട്രൈക്കർ കിലിയൻ എംബാപ്പെ ഹാട്രിക്കും നേടിയതോടെ ഖത്തറിലെ ലുസൈൽ സ്റ്റേഡിയത്തിൽ നടന്ന ആവേശകരമായ ലോകകപ്പ് ഫൈനൽ 3-3ന് അവസാനിച്ചു. ആവേശകരമായ പ്രകടനത്തിന് ഫ്രാൻസിനെയും മോദി പ്രശംസിച്ചു. തങ്ങളുടെ കഴിവും കായികക്ഷമതയും കൊണ്ട് ടീം ഫുട്ബോൾ ആരാധകരെ ആഹ്ലാദിപ്പിച്ചുവെന്ന് അദ്ദേഹം പറഞ്ഞു.