'എ​െൻറ സഹോദരി സുഹൃത്തും സംരക്ഷകയും'; രക്ഷാബന്ധനിൽ വൈകാരിക കുറിപ്പുമായി രാഹുൽ ഗാന്ധി

രക്ഷാബന്ധൻ ദിനത്തിൽ സഹോദരി പ്രിയങ്കയെകുറിച്ച്​ വൈകാരിക കുറിപ്പുമായി രാഹുൽ ഗാന്ധി. 'സുഹൃത്തും സംരക്ഷകയും എന്നാണ്​'പ്രിയങ്കയെ രാഹുൽ വിശേഷിപ്പിച്ചത്​. പ്രിയങ്കക്ക്​ ഒപ്പമുള്ള പഴയതും പുതിയതുമായ ചിത്രങ്ങളും ഇൻസ്​റ്റഗ്രാമിൽ രാഹുൽ പങ്കുവച്ചിട്ടുണ്ട്​. 'സഹോദരിയുടെ സ്​നേഹത്തിനും കൂട്ടിനും എ​െൻറ ജീവിതത്തിൽ വലിയ സ്വാധീനമുണ്ട്​. ഞങ്ങൾ പരസ്​പരം സുഹൃത്തുക്കളും സംരക്ഷകരുമാണ്​. എല്ലാവർക്കും രക്ഷാബന്ധൻ ആശംസകൾ'-രാഹുൽ കുറിച്ചു.

പ്രിയങ്കയും ട്വിറ്ററിൽ രാഹുലിന്​ രക്ഷാബന്ധൻ ആശംസകൾ നേർന്നു. പിതാവ്​ രാജീവ്​ ഗാന്ധിയോടൊപ്പമുള്ള ചിത്രവും പ്രിയങ്ക പങ്കുവച്ചിട്ടുണ്ട്​. രാഹുൽ ഗാന്ധിയെ ചേർത്തുപിടിച്ച്​ പിതാവിനൊപ്പം കാറിൽ ഇരിക്കുന്ന ചിത്രമാണ്​ പ്രിയങ്ക പങ്കുവച്ചത്​. 'എല്ലാ സഹോദരി സഹോദരന്മാർക്കും രക്ഷാബന്ധൻ ആശംസകൾ. നിങ്ങൾ പരസ്​പരം സംരക്ഷിക്കുകയും ​സ്​നേഹിക്കുകയും നർമം പങ്കിടുകയും ചെയ്യുക'-പ്രിയങ്ക ട്വിറ്ററിൽ കുറിച്ചു.

'എ​െൻറ സഹോദരനിൽ നിന്ന് സ്നേഹവും സത്യവും ക്ഷമയും ഞാൻ പഠിച്ചു. അത്തരമൊരു സഹോദരനെ ലഭിച്ചതിൽ ഞാൻ അഭിമാനിക്കുന്നു'-പ്രിയങ്ക ഗാന്ധി കഴിഞ്ഞ വർഷം ഹിന്ദിയിൽ ട്വീറ്റ് ചെയ്​തിരുന്നു. 1970 ൽ ജനിച്ച രാഹുൽ ഗാന്ധിക്ക്​ പ്രിയങ്കയേക്കാൾ രണ്ട് വയസ്സ് കൂടുതലാണ്.