ബംഗാൾ ബി​.ജെ.പി നേതാവ്​ മുകുൾ റോയ്​ പാളയം മാറി തൃണമൂലിലേക്ക്​?

ന്യൂഡൽഹി: പശ്​ചിമ ബംഗാളിൽ ബി.ജെ.പി പ്രചാരണം നയിക്കുകയും തൃണമൂലിനെ പുറത്താക്കാൻ പരമാവധി ​ശ്രമം നടത്തുകയും ചെയ്​ത നേതാവ്​ മുകുൾ റോയ്​ അവസരം തേടി പഴയ തട്ടകത്തിലേക്ക്​ മടങ്ങു​ന്നു? കൊൽക്കത്തയിൽ കഴിഞ്ഞ ദിവസം ചേർന്ന ബി.ജെ.പി യോഗത്തിൽനിന്ന്​ വിട്ടുനിന്നതോടെയാണ്​ മാധ്യമങ്ങൾ സൂചനയുമായി രംഗത്തെത്തിയത്​.

പലരും പാർട്ടി നേതാവ്​ അഭിഷേക്​ ബാനർജിയുമായി സംസാരിക്കുന്നുണ്ടെന്നും എന്നാൽ, തൃണമൂൽ ​പ്രതിസന്ധിയിലായ സമയത്ത്​ വിട്ടുനിന്നവരാണ്​ ഇവരെന്നും സൗഗത റോയ്​ എം.പി പറഞ്ഞു. നേരത്തെ പാർട്ടിവിട്ടുപോയവരിൽ മിതവാദികളും തീവ്രവാദികളുമെന്ന്​ രണ്ടു വിഭാഗങ്ങളായി കാണണമെന്നും അന്തിമ തീരുമാനം മമത സ്വീകരിക്ക​ട്ടെയെന്നുമാണ്​ ഇവരുടെ നിലപാട്​. സുവേന്ദു അധികാരി മമത ബാനർജിയെ തെറി വിളിച്ചപ്പോൾ മുകുൾ റോയ്​ ഒരിക്കലും അത്​ ചെയ്​തില്ലെന്നും റോയ്​ പറയുന്നു.

മമതയുടെ വിശ്വസ്​തരിൽ ഒരാളായിരുന്ന മുകുൾ റോയ്​ 2017ലാണ്​ പാർട്ടി വിട്ട്​ ബി.ജെ.പിയുടെ ഭാഗമായത്​. അദ്ദേഹത്തെ വിശ്വസിച്ചാണ്​ നിരവധി പേർ തെരഞ്ഞെടുപ്പിന്​ മുമ്പ്​ മമതയെ വിട്ട്​ ബി.ജെ.പി ടിക്കറ്റിൽ അങ്കത്തിനിറങ്ങിയത്​​.

അന്ന്​ തൃണമൂലിൽനിന്ന്​ രാജിനൽകിയ 35 പേരെങ്കിലും ഇതിനകം തിരിച്ചുവരാൻ താൽപര്യമറിയിച്ചതായാണ്​ റിപ്പോർട്ട്​. അടുത്തിടെ മുകുൾ റോയിയുടെ ഭാര്യ ആശുപത്രിയിലായപ്പോൾ തൃണമൂൽ നേതാവും മമതയുടെ ബന്ധുവുമായ അഭിഷേക്​ ബാനർജി ചെന്നുകണ്ടിരുന്നു. അതിനു ശേഷമാണ്​ തിരിച്ചുവരാനുള്ള മോഹം പങ്കുവെച്ചതെന്നാണ്​ സൂചന.

ചോർച്ചയുടെ സൂചന ശക്​തമായതോടെ ബംഗാൾ ബി.ജെ.പി നേതൃത്വത്തെ ഡൽഹിയിലേക്ക്​ വിളിപ്പിച്ചിട്ടുണ്ട്​. ചൊവ്വാഴ്ച ഡൽഹിയിലെത്തിയ സുവേന്ദു അധികാരി ബി.ജെ.പി അധ്യക്ഷൻ ജെ.പി നദ്ദ, ആഭ്യന്തര മന്ത്രി അമിത്​ ഷാ എന്നിവ​രുമായി കൂടിക്കാഴ്ച നടത്തി. അതിനിടെ, ബി.ജെ.പി സംഘടിപ്പിച്ച തെരഞ്ഞെടുപ്പ്​ അവലോകന യോഗത്തിൽനിന്നാണ്​ മുകുൾ​ റോയ്​ വിട്ടുനിന്നത്​.