ആഘോഷങ്ങൾ വീട്ടിലാക്കണം; കോവിഡ്​ രണ്ടാം തരംഗത്തിൽ നിന്ന്​ രാജ്യം മുക്​തി നേടിയിട്ടില്ലെന്ന്​ കേന്ദ്രം

ന്യൂഡൽഹി: കോവിഡ്​ രണ്ടാം തരംഗത്തിൽ നിന്നും രാജ്യം ഇനിയും മോചിതമായിട്ടില്ലെന്ന്​ കേ​ന്ദ്ര ആരോഗ്യമന്ത്രാലയം. ദീപാവലി, ഗണേശ ചതുർഥി തുടങ്ങിയ ആഘോഷങ്ങളിൽ ജാഗ്രത പുലർത്തണമെന്നും നിർദേശിച്ചു. വ്യാഴാഴ്ചയാണ്​ ആരോഗ്യമന്ത്രാലയത്തിന്‍റെ നിർദേശം പുറത്ത്​ വന്നത്​.

ഗണേശ ചതുർഥി, ദീപാവലി തുടങ്ങിയവ കഴിഞ്ഞ വർഷത്തേത്​ പോലെ തന്നെ ഈ വർഷവും ആഘോഷിക്കാം. ജനങ്ങൾ ഇത്തവണയും ആഘോഷ ദിവസങ്ങളിൽ വീടുകളിൽ തന്നെ കഴിയണമെന്ന്​ നീതി ആയോഗ്​ അംഗം വി.കെ.പോൾ പറഞ്ഞു. നിയ​ന്ത്രിതമായി മാത്രമേ ആഘോഷങ്ങളിൽ പ​ങ്കെടുക്കാവു. പൊതുസ്ഥലത്തേക്ക്​ പോവുകയാണെങ്കിൽ നിർബന്ധമായി മാസ്​ക്​ ധരിക്കണം. വിവിധ പ്രദേശങ്ങളിലെ കോവിഡ്​ നിയന്ത്രണങ്ങൾ പാലിക്കാൻ ജനങ്ങൾ തയാറാവണം.

രണ്ട്​ മാസത്തിനിടയിലെ ഏറ്റവും ഉയർന്ന നിരക്കിലേക്ക്​ രാജ്യത്തെ കോവിഡ്​ രോഗികളുടെ എണ്ണം വ്യാഴാഴ്ച എത്തിയിരുന്നു. രോഗികളിൽ 70 ശതമാനവും കേരളത്തിലാണ്​. അതേസമയം, കേരളത്തിലെ കോവിഡ്​ വ്യാപനം മറ്റ്​ സംസ്ഥാനങ്ങളിലുണ്ടാവാതിരിക്കാൻ ജാഗ്രത പുലർത്തുമെന്ന്​ കേന്ദ്ര ആരോഗ്യമന്ത്രി മൻസൂഖ്​ മാണ്ഡവ്യ പറഞ്ഞു.