ഒമിക്രോണിൽ മരണസാധ്യത കുറവ്​; മൂന്നാം തരംഗത്തിനായി ഇന്ത്യ തയാറെടുക്കണം

ഹൈദരാബാദ്​: ഒമിക്രോണിനെ കുറിച്ച്​ ലോാകരാജ്യങ്ങൾ കൂടുതൽ വിവരങ്ങൾ തേടുന്നതിനിടെ കോവിഡിന്‍റെ മൂന്നാം തരംഗം നേരിടാൻ ഇന്ത്യ തയാറെടുക്കണമെന്ന്​ ആരോഗ്യവിദഗ്​ധർ. ഒമിക്രോണിൽ മരണസാധ്യത കുറവാണെന്നും ബിബിനഗറിലെ ആൾ ഇന്ത്യ ഇൻസ്റ്റിറ്റ്യൂട്ട്​ ഓഫ്​ മെഡിക്കൽ സയൻസ്​ എക്​സിക്യൂട്ടീവ്​ ഡയറക്​ടർ ഡോ.വികാസ്​ ഭാട്ടിയ പറഞ്ഞു.

ഈ ഘട്ടത്തിൽ ഒമിക്രോണിനെ കുറിച്ച്​ ഒന്നും പറയാനാവില്ല. 30ഓളം രാജ്യങ്ങളിൽ ഒന്നോ രണ്ടോ പേർക്ക്​ മാത്രമാണ്​ ഇപ്പോൾ ഒമിക്രോൺ സ്ഥിരീകരിച്ചിരിക്കുന്നത്​. രോഗബാധയെ കുറിച്ചുള്ള കൂടുതൽ വിവരങ്ങൾക്കായി കാത്തിരിക്കുകയാണ്​. ഈ ഘട്ടത്തിൽ കോവിഡിന്‍റെ മൂന്നാം തരംഗത്തിനെതിരായി ഇന്ത്യ മുൻകരുതലെടുക്കണം. ഒമിക്രോണിൽ മരണസാധ്യത കുറവാണെന്നും അദ്ദേഹം പറഞ്ഞു.

ഒമിക്രോൺ മാരകമായ രോഗമല്ല. എന്നാൽ രോഗലക്ഷണങ്ങൾ കൂടുതൽ ദിവസങ്ങൾ പ്രകടമാവും. ഡെൽറ്റ വകഭേദവുമായി താരതമ്യം ചെയ്യു​േമ്പാഴും രോഗലക്ഷണങ്ങൾ പ്രകടമാവുന്ന ദിവസങ്ങളുടെ എണ്ണം കൂടുതലായിരിക്കും. കൂടുതൽ പേരിലേക്ക്​ വേഗത്തിൽ രോഗം പടരുകയും ചെയ്യും. എന്നാൽ മരണസാധ്യത കുറവായിരിക്കും.

ഒമിക്രോൺ ബാധിച്ചയാളുടെ ഓക്​സിജൻനില കുറഞ്ഞാൽ അത്​ സ്ഥിതി സങ്കീർണമാക്കും. രാജ്യത്തെ വാക്​സിനേഷൻ പ്രവർത്തനങ്ങൾ ആളുകളെ അത്തരമൊരു അവസ്ഥയിലേക്ക്​ എത്തിക്കില്ലെന്നാണ്​ പ്രതീക്ഷിക്കുന്നത്​. വാക്​സിൻ എടുക്കുന്നത്​ മൂലവും രോഗം വന്നതിനാലും ഉണ്ടാവുന്ന ഹൈബ്രിഡ്​ പ്രതിരോധം ഒമിക്രോണിനെ നേരിടാൻ സഹായിക്കുമെന്നും അദ്ദേഹം പറഞ്ഞു.

ഇന്ത്യയിൽ നിരവധി പേർക്ക്​ കോവിഡ്​ സ്ഥിരീകരിച്ചിട്ടുണ്ട്​. ഇതിനൊപ്പം വാക്​സിനേഷൻ നല്ല രീതിയിൽ മുന്നോട്ട്​ പോകുന്നുണ്ട്​. സീറോ സർവേയുടെ കണക്കനുസരിച്ച്​ 80 ശതമാനം പേരിലും കോവിഡ്​ ആന്‍റിബോഡി കണ്ടെത്തിയിട്ടുണ്ട്​. ജനങ്ങളിൽ ഭൂരിപക്ഷവും ഒരു ഡോസ്​ വാക്​സിനെങ്കിലും സ്വീകരിച്ചിട്ടുണ്ട്​. ഇത്​ ഒമിക്രോണിനെ പ്രതിരോധിക്കാൻ ഇന്ത്യയെ സഹായിക്കുമെന്നാണ്​ പ്രതീക്ഷയെന്നും അദ്ദേഹം കൂട്ടിച്ചേർത്തു.