പ്രധാനമന്ത്രിക്കെതിരെ മോശം പരാമർശം: കോൺഗ്രസ് നേതാവിനെതിരെ കേസ്

മുംബൈ: പ്രധാനമന്ത്രി നരേന്ദ്ര മോദിക്കെതിരെ അപകീർത്തികരമായ പരാമർശം നടത്തിയ മഹാരാഷ്ട്ര കോൺഗ്രസ് നേതാവിനെതിരെ കേസ്. എൻഫോഴ്‌സ്‌മെന്റ് ഡയറക്ടറേറ്റ് രാഹുൽ ഗാന്ധിയെ ചോദ്യം ചെയ്തതിനെതിരെ തിങ്കളാഴ്ച നടന്ന പ്രതിഷേധത്തിനിടെയാണ് മുൻ നാഗ്പൂർ കോൺഗ്രസ് അധ്യക്ഷൻ ഷെയ്ഖ് ഹുസൈൻ പ്രധാനമന്ത്രിക്കെതിരെ പരാമർശം നടത്തിയത്. ഹുസൈനെതിരെ നാഗ്പൂരിൽ ബി.ജെ.പി പരാതി നൽകിയിരുന്നു. സമാധാന ലംഘനത്തിന് പ്രേരിപ്പിക്കൽ, മനഃപൂർവം അപമാനിക്കൽ തുടങ്ങിയ കുറ്റങ്ങളാണ് ചുമത്തിയിട്ടുള്ളത്.

കോൺഗ്രസ് മുഖപത്രമായ നാഷനൽ ഹെറാൾഡുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ രാഹുൽ ഗാന്ധിക്ക് സമൻസ് അയച്ചതിൽ തിങ്കളാഴ്ച മുതൽ രാജ്യത്തുടനീളമുള്ള കോൺഗ്രസ് നേതാക്കൾ പ്രതിഷേധത്തിലാണ്.