ആ കരുതലിന്​ 63 കാരി പകരം നൽകിയത് മൂന്ന്​ നില വീടും​ കോടികളുടെ ആസ്​തിയും

മിനാത്തി പട്​നായിക്കിന്​ പ്രായം 63 പിന്നിട്ടു. വാർദ്ധക്യസഹജമായ അസുഖങ്ങൾ അലട്ടുന്നുണ്ട്​. എന്നാൽ മനസിനെ പ്രായമോ, അസുഖമോ ഒന്നും ബാധിച്ചിട്ടില്ല. ഒഡീഷ കട്ടക്കിലെ മൂന്ന്​ നില വീട്ടിൽ ഭർത്താവിനും മകൾക്കുമൊപ്പമായിരുന്നു മിനാത്തിയുടെ ലോകം. വൃക്ക തകരാറിലായ ഭർത്താവ് കഴിഞ്ഞ വർഷം​ മരിച്ചു. ആ വേദനകൾ മറികടക്കു​ം മു​െമ്പ മകളും ഹൃദയസ്​തംഭനം മൂലം മരണത്തിന്​ കീഴടങ്ങി. വേദനകളിൽ ഒറ്റപ്പെട്ടുപോയ മിനാത്തിയെ ചേർത്ത്​ പിടിച്ചത്​ ബുധ സമൽ എന്ന റിക്ഷാവാലയായിരുന്നു.

കഴിഞ്ഞ 25 വർഷമായി മിനാത്തിയുടെ കുടുംബത്തിന്‍റെ എന്താവശ്യങ്ങൾക്കും ബുധ സമൽ എന്ന റിക്ഷാവാലയുണ്ടായിരുന്നു. റിക്ഷ വലിച്ച്​​ കിട്ടുന്ന തുച്ഛമായ പണമായിര​ുന്നു ബുധയുടെ കുടുംബത്തിന്‍റെ ആകെ വരുമാനം. അങ്ങനെയിരിക്കെ ബുധയോട്​ മിനാത്തി കഴിഞ്ഞ ദിവസം ഒരു കാര്യം പറഞ്ഞു 'ഈ മൂന്ന്​ നില വീടും കോടികൾ വിലമതിക്കുന്ന മറ്റ്​ സ്വത്തുവഹകളും ഇനി ബുധക്കുള്ളതാണ്''​. ആ ഞെട്ടലിൽ നിന്ന്​ ബുധ ഇനിയും മുക്​തനായിട്ടില്ല.

മിനാത്തി ഇത്​ സംബന്ധിച്ചു മാധ്യമങ്ങളോട്​ പറഞ്ഞതിങ്ങനെയാണ്: ''ഭർത്താവും മകളും നഷ്​ടമായതോടെ ഞാൻ പൂർണമായും തകർന്നു, ദുഃഖത്തിലാണ്ടുപോയ എന്നെ ബന്ധുക്കളാരും തിരിഞ്ഞുനോക്കിയില്ല. ഒറ്റപ്പെട്ടു. എന്നാൽ ഞാൻ ഒറ്റപ്പെട്ട ആ ​നാളുകളിൽ ബുധയും കുടുംബവും എനിക്കൊപ്പം നിൽക്കുകയും തിരിച്ചൊന്നും പ്രതീക്ഷിക്കാതെ എന്നെ പരിപാലിക്കുകയും ചെയ്തു. എന്‍റെ ബന്ധുക്കൾക്ക് ആവശ്യത്തിലേറെ സ്വത്തുണ്ട്. എന്‍റെത്​ ഒരു പാവപ്പെട്ട കുടുംബത്തിന് നൽകാൻ ഞാൻ എന്നും ആഗ്രഹിച്ചിരുന്നു. ആ തീരുമാനമാണ്​ ബുധയിലേക്ക്​ എത്തിയത്​. എന്‍റെ മരണശേഷം ആരും അവരെ ഉപദ്രവിക്കാതിരിക്കാൻ എല്ലാം നിയമപരമായി രേഖകളാക്കിയെന്നും അവർ പറഞ്ഞു.''

ബുധയായിരുന്നു എന്‍റെ മകളെ കോളേജിലേക്ക് കൊണ്ടുപോയിരുന്നത്​. ഞങ്ങളുടെ കുടുംബത്തിന്‍റെ റിക്ഷാക്കാരനായിരുന്നു ആ മനുഷ്യൻ. വിശ്വസ്​തനായിരുന്നു​. ഞാനി​പ്പോൾ ചെയ്​തത്​ വലിയ കാര്യമൊന്നുമല്ല, അവൻ അർഹിക്കുന്ന ഒന്നാണത്​... മിനാറ്റി കൂട്ടി​ച്ചേർത്തു.

മിനാറ്റിയുടെ മൂന്ന് സഹോദരിമാരിൽ രണ്ട് പേർ ഈ തീരുമാനത്തെ ശക്​തമായി എതിർത്തെങ്കിലും പക്ഷെ മിനാറ്റി തീരുമാനത്തിൽ ഉറച്ചുനിന്നു.

മാതാപിതാക്കളും ഭാര്യയും ഒരു മകളടക്കം മുന്ന്​ മക്കളുമടങ്ങുന്നതാണ്​ ബുധയുടെ കുടുംബം.മാ(മിനാറ്റി)യുടെ തീരുമാനം അറിഞ്ഞപ്പോൾ ഞെട്ടിപ്പോയെന്നായിരുന്നു ബുധ പറഞ്ഞത്​. കഴിഞ്ഞ രണ്ട് പതിറ്റാണ്ടിലേറെയായി ഞാൻ ഈ കുടുംബത്തെ സേവിക്കുന്നു, എന്‍റെ മരണം വരെ അത്​ തുടരുമെന്നും ബുധ പറഞ്ഞു.