ഒഡീഷയിൽ നാടൻ ബോംബ് സ്ഫോടനത്തിൽ ഒരു മരണം

ഗൻജം: ഒഡീഷയിലെ ഗൻജമിൽ വീട്ടിലുണ്ടായ നാടൻ ബോംബ് സ്ഫോടനത്തിൽ ഒരാൾ മരിച്ചു. രണ്ടു പേർക്ക് ഗുരുതര പരിക്ക്. ഗൻജം ജില്ലയിലെ ബാദഗദ പൊലീസ് സ്റ്റേഷൻ പരിധിയിലെ ഭിംപൂർ ഗ്രാമത്തിലാണ് സംഭവം.

ഭിംപൂർ സ്വദേശി ബുലു മല്ലിക്കാണ് മരിച്ചത്. ബാതാ സഷാന ഗ്രാമവാസികളായ പ്രകാശ് നായക്, നന്ദിയ മാലിക്ക് എന്നിവർക്കാണ് പരിക്കേറ്റത്. പരിക്കേറ്റവരെ ആശുപത്രിയിൽ പ്രവേശിപ്പിച്ചു.

കാട്ടുപന്നിയെ കൊല്ലാൻ വേണ്ടിയാണ് മൂന്നംഗ സംഘം നാടൻ ബോംബ് നിർമിച്ചതെന്ന് പൊലീസ് പറഞ്ഞു. സ്ഫോടനത്തിന് പിന്നാലെ സ്ഥലത്തെത്തിയ വനം വകുപ്പും പ്രാദേശിക പൊലീസും അന്വേഷണം ആരംഭിച്ചു.