മോദിയുടെ തട്ടകത്തിൽ എ.ബി.വി.പിയെ മലർത്തിയടിച്ച്​ എൻ.എസ്​.യു(ഐ)

വാരാണസി: നരേന്ദ്ര മോദിയുടെ തട്ടകമായ വാരാണസിയിലെ മഹാത്​മാഗാന്ധി കാശി വിദ്യാപീഠ്​ യൂനിവേഴ്​സിറ്റിയിൽ സ്​റ്റുഡന്‍റ്​സ്​ യൂനിയൻ തെരഞ്ഞെടുപ്പിൽ കോൺഗ്രസിന്‍റെ വിദ്യാർഥി സംഘടനയായ എൻ.എസ്​.യു (ഐ)വിന്​ തകർപ്പൻ ജയം. തെരഞ്ഞെടുപ്പിൽ വൈസ്​ പ്രസിഡന്‍റ്​, ജനറൽ സെക്രട്ടറി പോസ്റ്റുകളിലേക്ക്​ എ.ബി.വി.പി സ്​ഥാനാർഥികളെ മലർത്തിയടിച്ചാണ്​ എൻ.എസ്​.യുവിന്‍റെ മിന്നുംജയം.

വൈസ്​ പ്രസിഡന്‍റ്​ സ്​ഥാനത്തേക്ക്​ സന്ദീപ്​ പാൽ വിജയിച്ചപ്പോൾ ജനറൽ സെക്രട്ടറി പോസ്റ്റിൽ പ്രഫുല്ല പാണ്ഡേയാണ്​ തെരഞ്ഞെടുക്കപ്പെട്ടത്​. പ്രസിഡന്‍റ്​ സ്​ഥാനത്തേക്ക്​ സമാജ്​വാദി പാർട്ടിയുടെ വിദ്യാർഥി വിഭാഗമായ സമാജ്​വാദി ഛത്ര സഭ സ്​ഥാനാർഥിയായ വിമലേഷ്​ യാദവ്​ ആണ്​ വിജയിച്ചത്​. ഒരു പോസ്റ്റിലും എ.ബി.വി.പിക്ക്​ ജയം നേടാൻ കഴിഞ്ഞില്ലെന്നതാണ്​ തെരഞ്ഞെടുപ്പിലെ സവിശേഷത.

2017ലും കാശി വിദ്യാപീഠ്​ യൂനിവേഴ്​സിറ്റിയിൽ എ.ബി.വി.പിക്കുമേൽ എൻ.എസ്​.യു ജയം നേടിയിരുന്നു. മോദി പ്രതിനിധാനം ചെയ്യുന്ന വാരാണസി പാർലമെന്‍റ്​ മണ്ഡലത്തിൽ ബി.ജെ.പിയുടെ വിദ്യാർഥി സംഘത്തിനേറ്റ തിരിച്ചടി സമൂഹ മാധ്യമങ്ങളിലടക്കം ചർച്ചയാണ്​. ഉത്തർപ്രദേശിലെ യുവജനങ്ങൾക്കിടയിൽ മാറിവരുന്ന മനോഭാവത്തിന്‍റെ സൂചനയാണ്​ എൻ.എസ്​.യു വിജയമെന്ന്​ കോൺഗ്രസ്​ നേതാക്കൾ പറയുന്നു. 2022ലെ നിയമസഭ തെരഞ്ഞെടുപ്പിൽ ഈ മാറ്റം പ്രതിഫലിക്കുമെന്നാണ്​ അവരുടെ അവകാശവാദം.