'ഇന്ന് അവർ അഭിഭാഷകരെയും തേടി വന്നു, നാളെ നിങ്ങളെയും തേടി വരും; ഒറ്റക്കെട്ടായി പൊരുതേണ്ടതുണ്ട്'

ന്യൂഡൽഹി: ഡൽഹി കലാപക്കേസുകളിൽ ഇരകൾക്കായി ഹാജരാകുന്ന അഭിഭാഷകൻ മഹ്മൂദ് പ്രാച്ചയുടെ ഓഫിസിൽ ഡൽഹി പൊലീസ് നടത്തിയ റെയ്ഡിനെതിരെ രൂക്ഷ പ്രതികരണവുമായി മുതിർന്ന അഭിഭാഷകൻ പ്രശാന്ത് ഭൂഷൺ. ഇതിനെതിരെ നാം ഒറ്റക്കെട്ടായി പോരാടേണ്ടതുണ്ടെന്ന് അദ്ദേഹം പറഞ്ഞു.

'ആദ്യം അവർ ആക്ടിവിസ്റ്റുകളെ തേടിയെത്തി. പിന്നീട് വിദ്യാർഥികളെ തേടിയെത്തി. ശേഷം കർഷകരെ തേടിയെത്തി. ഇപ്പോൾ അഭിഭാഷകരെയും തേടിയെത്തിയിരിക്കുകയാണ്. അടുത്തതായി അവർ നിങ്ങളെയും തേടിയെത്തും. ഇത് ഒരു ജനാധിപത്യ വ്യവസ്ഥിതിയാണെന്ന് നിങ്ങൾക്ക് പറയാനാകുമോ. നാം ഇതിനെതിരെ ഒറ്റക്കെട്ടായി പോരാടേണ്ടതുണ്ട്' -പ്രശാന്ത് ഭൂഷൺ ട്വീറ്റ് ചെയ്തു.

First they came for activists; then they came for students; then they came for farmers; now they are coming for their lawyers; Next, they will come for you.
Will you call this a Democracy?
We will all have to fight this together. https://t.co/ZggkHS3uyk

— Prashant Bhushan (@pbhushan1) December 24, 2020

നിയമജ്ഞരുടെ അവകാശങ്ങൾക്കു മേലുള്ള കടന്നുകയറ്റമാണിതെന്ന് അഭിഭാഷക ഇന്ദിര ജെയ്സിങ് പ്രതികരിച്ചു. ഈ അതിക്രമത്തിനെതിരെ അഭിഭാഷകർ പ്രതിഷേധിക്കണമെന്നും അവർ പറഞ്ഞു.

The raids on Mahmood Pracha Lawyer for the defence in the Delhi riots case is a direct attack on the fundamental right of the right to legal representation , all lawyers must condemn this attack

— Indira Jaising (@IJaising) December 24, 2020

അഭിഭാഷകൻ മഹ്മൂദ് പ്രാച്ചയുടെ ഡൽഹി നിസാമുദ്ദീനിലെ ഓഫിസിൽ ഉച്ചക്ക് 12.30ന് ആരംഭിച്ച റെയ്ഡ് രാത്രിയും തുടരുകയാണ്. വ്യാജരേഖകൾ കണ്ടെത്താനായാണ് റെയ്ഡ് നടത്തുന്നതെന്നാണ് പൊലീസ് പറയുന്നത്. പ്രാച്ചയുടെ ഓഫിസിലെ ലാപ്ടോപ്പുകളുടെയും ഇ-മെയിലിന്‍റെയും പാസ് വേഡുകൾ പൊലീസ് ആവ‍ശ്യപ്പെട്ടിട്ടുണ്ട്. ഇതു സംബന്ധിച്ച് മഹ്മൂദ് പ്രാച്ചയും ഉദ്യോഗസ്ഥരും തമ്മിൽ സംസാരിക്കുന്നതിന്‍റെ വിഡിയോ പുറത്തുവന്നിട്ടുണ്ട്.