ഇനിമുതൽ സമർപ്പിത ബി.ജെ.പി പ്രവർത്തകനായിരിക്കും​; കോൺഗ്രസ്​ വിട്ടതിൽ പ്രതികരിച്ച്​ ജിതിൻ പ്രസാദ

ന്യൂഡൽഹി: രാജ്യത്ത്​ ഇന്ന്​ ഒരു ദേശീയ പാർട്ടിയുണ്ടെങ്കിൽ അത്​ ബി.ജെ.പിയാണെന്നും മറ്റുളളവയെല്ലാം ചില വ്യക്തികളിലോ പ്രദേശങ്ങളിലോ മാത്രം ഒതുങ്ങുകയാണെന്നും കോൺഗ്രസ്​ വിട്ട്​ ബി.ജെ.പിയിൽ ചേർന്ന ജിതിൻ പ്രസാദ. കോൺഗ്രസ്​ ബന്ധം ഉപേക്ഷിച്ച്​ ബി.ജെ.പിയിൽ ചേർന്നതിനോട്​ പ്രതികരിക്കുകയായിരുന്നു മുൻ കേന്ദ്രമന്ത്രി കൂടിയായ അദ്ദേഹം.

ജനങ്ങളെ സഹായിക്കാൻ കഴിയില്ലെന്നും അവരുടെ താൽപര്യങ്ങൾ സംരക്ഷിക്കാൻ കഴിയില്ലെന്നും മനസിലാക്കിയതിനെ തുടർന്നാണ്​ കോൺഗ്രസ്​ വിട്ടത്​. മുൻ വർഷങ്ങളിൽ എന്നെ അനുഗ്രഹിച്ച കോൺഗ്രസിലെ ജനങ്ങൾക്ക്​ ഞാൻ നന്ദി പറയുന്നു. ഇനിമുതൽ ഒരു സമർപ്പിത ബി.ജെ.പി പ്രവർത്തകനായി പ്രവർത്തിക്കും -അദ്ദേഹം കൂട്ടിച്ചേർത്തു.

മുതിർന്ന കോൺ​ഗ്രസ്​ നേതാവും മുൻ കേന്ദ്രമന്ത്രിയുമായ ജിതിൻ പ്രസാദ ബുധനാഴ്ച ഉച്ചയോടെയാണ്​ ബി.ജെ.പിയിൽ ചേർന്നത്​. കേന്ദ്രമന്ത്രി പീയുഷ്​ ഗോയലിന്‍റെയും ബി.ജെ.പി വക്താവ്​ അനിൽ ബലൂനിയുടെയും സാന്നിധ്യത്തിലാണ്​ ജിതിൻ ​പ്രസാദ ബി.ജെ.പി അംഗത്വം സ്വീകരിച്ചത്​.

ഉത്തർപ്രദേശിൽ കോൺഗ്രസിന്‍റെ ന​ട്ടെല്ലായിരുന്നു ജിതിൻ പ്രസാദ. കോൺഗ്രസ്​ നേതാവ്​ രാഹുൽ ഗാന്ധിയുടെ അടുത്ത വിശ്വസ്​തൻ കൂടിയായിരുന്നു അദ്ദേഹം. അടുത്തവർഷം നടക്കാനിരിക്കുന്ന ഉത്തർപ്രദേശ്​ നിയമസഭ തെരഞ്ഞെടുപ്പിന്​ മുന്നോടിയായാണ്​ ജിതിൻ പ്രസാദയുടെ ബി.ജെ.പിയിലേക്കുള്ള ചേക്കേറൽ. ഉത്തർപ്രദേശിൽ നിയമസഭ തെരഞ്ഞെടുപ്പിന്​ മുന്നോടിയായി ബി.ജെ.പിയിൽ ചേരാനുള്ള തീരുമാനം രാഷ്​ട്രീയമായി ഗുണം ചെയ്യുമെന്ന വിലയിരുത്തലിലാണ്​ അദ്ദേഹത്തിന്‍റെ പുതിയ നീക്കം.

പശ്ചിമ ബംഗാളിലെ നിയമസഭ തെരഞ്ഞെടുപ്പിൽ എ.ഐ.സി.സിയുടെ ചുമതല വഹിച്ചിരുന്നയാളാണ്​ 47കാരനായ ജിതിൻ പ്രസാദ. ഉത്തർ​പ്രദേശിൽ കോൺഗ്രസ്​ കടുത്ത പ്രതിസന്ധിയിലായതോടെ, ലോക്​സഭ തെരഞ്ഞെടുപ്പിൽ രണ്ടുതവണ ജിതിൻ ​പ്രസാദ പരാജയപ്പെട്ടിരുന്നു. അദ്ദേഹത്തിന്‍റെ പിതാവ്​ ജിതേന്ദ്ര പ്രസാദ പ്രമുഖ കോൺഗ്രസ്​ നേതാവാണ്​.