പ്രണബ്​ മുഖർജി ആർ.എസ്​.എസ്​ ക്ഷണം സ്വീകരിച്ചതിൽ തെറ്റില്ല-സുശീൽ കുമാർ ഷിൻഡെ

നാഗ്​പൂർ: ആർ.എസ്​.എസ് ആസ്​ഥാനത്ത്​ നടക്കുന്ന​ പരിപാടിയിൽ മുഖ്യ അതിഥിയായി പ​െങ്കടുക്കാനുള്ള ക്ഷണം സ്വീകരിച്ച മുൻ രാഷ്​ട്രപതി പ്രണബ്​ മുഖർജിയെ​ പിന്തുണച്ച്​ കോൺഗ്രസ്​ നേതാവ്​ സുശീൽ കുമാർ ഷിൻഡെ രംഗത്ത്​. മുൻ രാഷ്​ട്രപതി ആർ.എസ്​.എസ്​ ക്ഷണം സ്വീകരിച്ചതിൽ തെറ്റില്ലെന്ന്​ അദ്ദേഹം പറഞ്ഞു.

 പ്രണബ്​ മുഖർജി ഒരു മതേതര വ്യക്തിയാണ്​. എല്ലായ്​പ്പോഴും മതേതര കാഴ്​ചപ്പാട്​ മുന്നോട്ടു വെക്കുന്ന അദ്ദേഹം അതു തന്നെ ആർ.എസ്​.എസ്​ പരിപാടിയിലും അവതരിപ്പിക്കും. മികച്ച ചിന്തകനായ അദ്ദേഹം അവിടെ പോവുകയും  ആ വേദിയിൽ സംസാരിക്കുകയും ചെയ്യേണ്ടത്​ വളരെ പ്രധാനമാണെന്നും  ഷിൻഡെ പറഞ്ഞു. പ്രണബ്​ മുഖർജിയുടെ ചിന്തകൾ ആർ.എസ്​.എസിൽ അൽപമെങ്കിലും മികവ്​ വര​ുത്തുകയാണെങ്കിൽ തങ്ങൾ ഏറെ സന്തോഷിക്കുമെന്നും അദ്ദേഹം പറഞ്ഞു. നാഗ്​പൂരിൽ ഒരു പരിപാടിക്കിടെ മാധ്യമപ്രവർത്തകരോട്​ സംസാരിക്കുകയായിരുന്നു ഷിൻഡെ.

ജൂൺ ഏഴിന്​ നടക്കുന്ന ആർ.എസ്​.എസ്​ പ്രവർത്തകരുടെ പരിശീലന പരിപാടിയുടെ സമാപനയോഗത്തിൽ മുഖ്യാതിഥിയായാണ്​ പ്രണബ്​ മുഖർജിയെ ക്ഷണിച്ചിരിക്കുന്നത്​. ആർ.എസ്​.എസ്​ ക്ഷണം സ്വീകരിച്ച പ്രണബ്​ മുഖർജിയുടെ തീരുമാനത്തിനെതിരെ കോൺഗ്രസിൽ അസ്വാരസ്യങ്ങൾ പുകയുകയാണ്​. പ​െങ്കടുക്കുന്ന കാര്യം പുനഃപരിശോധിക്കണമെന്ന്​ പലരും അദ്ദേഹത്തോട്​ ആവശ്യപ്പെട്ടിരുന്നു.