ഗതാഗത സൗകര്യമില്ല; ആശുപത്രിയിലേക്കുള്ള വഴിമധ്യേ ആദിവാസി സ്​ത്രീ പ്രസവിച്ചു

രാജ്യ​ത്തെ പിന്നാക്ക വിഭാഗക്കാരുടെ ജീവിതനിലവാരം എത്രത്തോളം മോശമാണെന്ന്​ തെളിയിക്കുകയാണ്​ മഹാരാഷ്​ട്രയിൽനിന്നുള്ള വാർത്ത. മു​ംബൈയിൽനിന്ന്​ 80 കിലോമീറ്റർ മാത്രം അകലെയുള്ള മുർബാദിലെ മനിവാലി ഗ്രാമത്തിൽ ആദിവാസി സ്​ത്രീ ആശുപത്രിയിലേക്കുള്ള വഴിമധ്യേ പ്രസവിച്ച വാർത്ത പലരും ഞെട്ടലോടെയാണ്​ കേട്ടത്​.

മുർബാദിനിന്നും എട്ട് കിലോമീറ്റർ അകലെയുള്ള ആദിവാസി ഗ്രാമത്തിലാണ്​ 24കാരിയായ പുഷ്​പയു​െട കുടുംബവും താമസിക്കുന്നത്​. 60ഓളം വീടുകളും 200ഓളം ആളുകളും ഇവിടെയുണ്ട്​. ഈ ഗ്രാമത്തി​െൻറ മൂന്ന്​ ഭാഗവും വെള്ളമാണ്​. മറ്റു വശങ്ങളിൽ കൊടുംകാടും​. ഗതാഗത മാർഗങ്ങൾ ഇല്ലാത്തതിനാൽ രോഗികളോ ഗർഭിണികളോ ആയ സ്ത്രീകളെ ചുമന്നുവേണം ആശുപത്രികളിൽ എത്തിക്കാൻ. ഇത്തരമൊരു യാത്രയിലാണ്​ ഡിസംബർ 12ന്​ തൊഴിലാളിയായ പുഷ്​പ വഴിയോരത്ത്​ പ്രസവിച്ചത്​. പൊക്കിൾകൊടി മുറിച്ചുമാറ്റാൻ കഴിയാത്തതിനാൽ ബന്ധുക്കൾ താങ്ങിയെടുത്താണ്​ ഇവരെ​ ആശുപത്രിയിൽ എത്തിച്ചത്​.

ഭർത്താവി​െൻറ നാട്ടിൽനിന്ന്​​ സ്വന്തം വീട്ടിലെത്തിയതായിരുന്നു പുഷ്​പ. അർധരാത്രി ഇവർക്ക്​​ പ്രസവവേദന അനുഭവപ്പെടാൻ തുടങ്ങിയതോടെ​ കൊടുംകാട്ടിലൂടെ നടത്തം തുടങ്ങി. മാതാപിതാക്കളും നാട്ടുകാരും കൂടെയുണ്ടായിരുന്നു. വേദന കടുത്തതോടെ ടോർച്ചി​െൻറയും മൊബൈൽ ഫോണുകളുടെയും വെളിച്ചത്തിൽ പ്രസവമെടുത്തു. ആൺകുട്ടിക്കാണ്​ ഇവർ ജന്മം നൽകിയത്​​. പൊക്കിൾകൊടി മുറിച്ചുമാറ്റാൻ കഴിയാത്തിനാൽ പെ​ട്ടെന്ന്​ ​തൂക്കുമഞ്ചമുണ്ടാക്കി അതിൽ കിടത്തി ആശുപത്രിയിലേക്ക്​ കൊണ്ടുപോയി.

30കാരനായ രമേഷ്​ ശിങ്​വയാണ്​ പുഷ്​പയുടെ ഭർത്താവ്​. രാത്രി 3.30ഓടെയാണ്​ വീട്ടുകാർ പ്രസവവിവരം രമേഷിനെ അറിയിക്കുന്നത്​. വഴിമധ്യേ പ്രസവിച്ച വിവരം കേട്ടപ്പോൾ ആദ്യമൊന്ന്​ പേടിച്ചെങ്കിലും അമ്മയും കുട്ടിയും സുഖമായിരിക്കുന്നു​െവന്ന്​ അറിഞ്ഞപ്പോഴാണ്​ ഇദ്ദേഹത്തിന്​ സമാധാനമായത്​. ഇവർക്ക്​ രണ്ട്​ മക്കൾ കൂടിയുണ്ട്​. ദിവസക്കൂലിക്കാരനാണ്​ രമേഷ്​. ഇദ്ദേഹത്തി​െൻറ​ പ്രതിദിന വരുമാനം 250 രൂപയാണ്​.

കഴിഞ്ഞ ജൂലൈയിലും സമാനമായ സംഭവം ഗ്രാമത്തിലുണ്ടായിട്ടുണ്ട്​. ഇത്തരം സംഭവങ്ങൾ ഞെട്ടിക്കുന്നതാണെന്ന്​ സാമൂഹിക പ്രവർത്തകർ പറയുന്നു. സർക്കാറുകൾ ഇത്തരം സ്​ഥലങ്ങളിലേക്ക്​ ആംബുലൻസ്​ അടക്കം എത്തിച്ചേരാനുള്ള വഴി ഒരുക്കണമെന്ന്​ ഇവർ ആവശ്യപ്പെടുന്നു. ഗ്രാമത്തിലേക്ക്​ കുടിവെള്ള ടാങ്കറുകൾക്കും എത്തിപ്പെടാൻ കഴിയുന്നില്ലെന്ന്​ നാട്ടുകാർ കുറ്റ​പ്പെടുത്തി. ഗ്രാമീണരുടെ ​പ്രശ്​നങ്ങൾ ചൂണ്ടിക്കാട്ടി കല്യാണിലെ സബ്​ ഡിവിഷനൽ മജിസ്​ട്രേറ്റിന്​ പരാതി നൽകിയിട്ടുണ്ട്​.

അതേസമയം, ഇവരുടെ പ്രസവത്തെ തുടർന്ന്​ വിവാദവും ഉടലെടുത്തിട്ടുണ്ട്​. ആശുപത്രിയിൽ എത്തിച്ചശേഷമാണ്​ പുഷ്​പ ആൺകുട്ടിക്ക്​ ജന്മം നൽകി​യതെന്നാണ്​ ഡോക്​ടർമാരുടെയും അധികൃതരുടെയും വാദം. മൂന്ന്​ ദിവസം ആശുപത്രിയിൽ തങ്ങിയശേഷം ഇവരെ ഡിസ്​ചാർജ്​ ചെയ്​തതായും ഡോക്​ടർമാർ പറയുന്നു. എന്നാൽ, ഇക്കാര്യം നിഷേധിച്ച്​ പുഷ്​പയുടെ ബന്ധുക്കൾ തന്നെ രംഗത്തുവന്നിട്ടുണ്ട്​.