കോൺഗ്രസുമായി ഒരു സംസ്ഥാനത്തിലും സഖ്യമില്ല- മായാവതി

ലഖ്​നോ: കോൺഗ്രസുമായി സഖ്യമില്ലെന്ന്​ ഉറപ്പിച്ച്​ ബി.എസ്​.പി അധ്യക്ഷ മായാവതി. കോൺഗ്രസുമായി സഖ്യം ചേർന്നാൽ പാർട്ടിക്ക്​ യാതൊരു ഗുണവുമില്ല. ​ ഒരു സംസ്ഥാനത്തിലും കോൺഗ്രസുമായി തെരഞ്ഞെടുപ്പ്​ സഖ്യമില്ലെന്നും​ മായാവതി അറിയിച്ചു​.

സത്യസന്ധമായ ഉദ്ദേശത്തോടെയും പരസ്​പര ബഹുമാനത്തോടെയുമുള്ള സഖ്യമാണ്​ ഉത്തർപ്രദേശിൽ സമാജ്​വാദി പാർട്ടിയും ബി.എസ്​.പിയും തമ്മിലുള്ളത്​. ബി.ജെ.പിയെ പരാജയപ്പെടുത്താനും സാമൂഹിക മാറ്റങ്ങൾ കൊണ്ടുവരാനും പ്രാപ്​തിയുള്ള സഖ്യമാണ്​ അതെന്നും മായാവതി പറഞ്ഞു.

ബി.​എസ്​.പിയുമായി കൈകോർക്കാൻ നിരവധി പാർട്ടികൾ മുന്നോട്ടു​വരുന്നുണ്ട്​. എന്നാൽ തെരഞ്ഞെടുപ്പ്​ വിജയം എന്ന ലക്ഷ്യത്തിനു വേണ്ടിയും അവരുടെ നേട്ടങ്ങൾക്കു വേണ്ടിയും മാത്രം സഖ്യം ചേരുന്നതിൽ താൽപര്യമില്ലെന്ന നിലപാടാണ്​ ബി.എസ്​.പിയുടേതെന്നും അവർ വ്യക്തമാക്കി.