ഇന്ത്യൻ വിദ്യാർഥികളെ ബന്ദികളാക്കിയെന്ന റഷ്യൻ ആരോപണം നിഷേധിച്ച്​ വിദേശകാര്യമന്ത്രാലയം

ന്യൂഡൽഹി: ഇന്ത്യൻ വിദ്യാർഥികളെ മനുഷ്യകവചമാക്കുന്നുവെന്ന ആരോപണം തള്ളി വിദേശകാര്യമന്ത്രാലയം. യുക്രെയ്​നിലുള്ള ഇന്ത്യക്കാരുമായി നിരന്തരമായി ബന്ധപ്പെട്ട്​ വരികയാണെന്നും കേന്ദ്രസർക്കാർ വ്യക്​തമാക്കി. ഇന്ത്യക്കാരെ ബന്ദികളാക്കിയെന്ന വിവരം ഇതുവരെ എവിടെ നിന്നും ലഭിച്ചിട്ടില്ലെന്നും കേന്ദ്രസർക്കാർ അറിയിച്ചു.

വിദ്യാർഥികളെ ബന്ദികളാക്കിയെന്ന റിപ്പോർട്ട്​ ഇതുവരെ ലഭിച്ചിട്ടില്ല. ഖാർക്കീവിൽ നിന്നും സമീപപ്രദേശങ്ങളിലും നിന്നും ഇന്ത്യൻ വിദ്യാർഥികൾക്ക്​ യാത്ര ചെയ്യുന്നതിനായി പ്രത്യേക ട്രെയിനുകൾ ഏർപ്പെടുത്തണമെന്ന്​ യുക്രെയ്​ൻ സർക്കാറിനോട്​ അഭ്യർഥിച്ചിട്ടുണ്ട്​. യുക്രെയ്​നിന്‍റെ കിഴക്കൻ മേഖലകളിൽ കുടുങ്ങിക്കിടക്കുന്നവരെ പടിഞ്ഞാറൻ പ്രദേശങ്ങളിലെത്തിക്കുന്നതിനുള്ള ശ്രമങ്ങളാണ്​ പുരോഗമിക്കുന്നതെന്ന്​ വിദശേകാര്യമന്ത്രാലയം വക്​താവ്​ അരിന്ദം ബാച്ചി പറഞ്ഞു.

നേരത്തെ തങ്ങൾക്ക്​ ലഭിച്ച വിവരമനുസരിച്ച്​ ഇന്ത്യൻ വിദ്യാർഥികളെ ഖാർക്കീവ്​ വിടാൻ യുക്രെയ്​ൻ അനുവദിക്കുന്നില്ലെന്ന്​ മനസിലാക്കിയെന്ന്​ റഷ്യ അറിയിച്ചിരുന്നു. അവരെ മനുഷ്യകവചമാക്കുകയാണ് യുക്രെയ്​ൻ ചെയ്യുന്നത്​​. ഇന്ത്യൻ പൗരൻമാരെ സുരക്ഷിതമായി യുക്രെയ്​നിൽ നിന്നും പുറത്തെത്തിക്കാനുള്ള നടപടികൾ സ്വീകരിക്കാൻ റഷ്യ തയാറാണ്​. പിന്നീട്​ റഷ്യയിൽ നിന്നും ഇന്ത്യയുടെ വിമാനങ്ങളിലോ തങ്ങളുടെ വിമാനത്തിലോ ഇവരെ നാട്ടിലെത്തിക്കാൻ തയാറാണെന്നും റഷ്യൻ പ്രതിരോധ മന്ത്രാലയം അറിയിച്ചിരുന്നു.