ഓക്​സിജൻ കിട്ടിയില്ല; ഹരിയാനയിൽ നാലു കോവിഡ്​ രോഗികൾ മരിച്ചു

റെവാരി: ഹരിയാനയിൽ ഓക്​സിജൻ ക്ഷാമത്തെ തുടർന്ന്​ ഞായറാഴ്​ച നാലു കോവിഡ്​ രോഗികൾ മരിച്ചു. റെവാരിയിലെ സ്വകാര്യ ആശുപത്രിയിലാണ്​ സംഭവം.

മൂന്നു രോഗികൾ ഐ.സി.യുവിലും ഒരാൾ വാർഡിലുമാണ്​ മരിച്ചത്​. മരിച്ചവരുടെ ബന്ധുക്കൾ രോഷാകുലരായി ആശുപത്രിക്കു​ മുന്നിൽ പ്രതിഷേധിച്ചു. ആശുപത്രിയിൽ ഓക്​സിജന്​ കടുത്ത ക്ഷാമമുണ്ടെന്ന്​ ഇവർ ആരോപിച്ചു. അതേസമയം, ഓക്​സിജൻ ക്ഷാമത്തെക്കുറിച്ച്​ നിരന്തരം ജില്ല ഭരണകൂടത്തെ അറിയിച്ചിരുന്നുവെന്ന്​ ആശുപത്രി വൃത്തങ്ങൾ പറഞ്ഞു.

ആശുപത്രിയിൽ ഒരു ദിവസം 300 ഓക്​സിജൻ സിലിണ്ടറുകളാണ്​ വേണ്ടത്​. 114 കോവിഡ്​ രോഗികളാണ്​ ആശുപത്രിയിലുള്ളത്​. സംഭവത്തെക്കുറിച്ച്​ അന്വേഷിക്കാൻ ജില്ല ഭരണകൂടം ഉത്തരവിട്ടു.