ജനിതകമാറ്റം സംഭവിച്ച​ കൊറോണ വൈറസിനെതിരെയും വാക്​സിൻ ഫലപ്രദമെന്ന്​ ആരോഗ്യമന്ത്രാലയം

ന്യൂഡൽഹി: യു.കെയിൽ കണ്ടെത്തിയ ജനിതകമാറ്റം സംഭവിച്ച കൊറോണ വൈറസിനെതിരെ നിലവിലുള്ള വാക്​സിനുകൾ ഫലപ്രദ​െമന്ന്​ ആരോഗ്യമന്ത്രാലയം. ചൊവ്വാഴ്ച നടത്തിയ വാർത്തസമ്മേളനത്തിലാണ്​ ഇക്കാര്യം അറിയിച്ചത്​. ജനിതക മാറ്റം സംഭവിച്ച വൈറസിനെതിരെ വാക്​സിൻ ഫലപ്രദമല്ലെന്ന റിപ്പോർട്ടുകൾ പുറത്ത്​ വന്നിരുന്നു. ഇതിന്​ പിന്നാലെയാണ്​ മന്ത്രാലയത്തിന്‍റെ വിശദീകരണം.

ജനിതകമാറ്റം സംഭവിച്ച വൈറസിനെതിരെ വാക്​സിൻ ഫലപ്രദമല്ലെന്നതിന്​ തെളിവുകളൊന്നും ലഭിച്ചിട്ടില്ലെന്ന്​ കേന്ദ്രസർക്കാറിന്‍റെ ശാസ്​ത്ര ഉപദേഷ്​ടാവ്​ കെ.വിജയരാഘവൻ പറഞ്ഞു. വൈറസിനെതിരായ ആന്‍റിബോഡികൾ ഉണ്ടാക്കുകയാണ്​ വാക്​സിനുകൾ ചെയ്യുന്നത്​. വൈറസിനുണ്ടാവുന്ന ചെറിയ ജനിതകമാറ്റങ്ങൾ വാക്​സിനുക​ളുടെ ഫലപ്രാപ്​തിയെ ഇല്ലാതാക്കില്ലെന്ന്​ അദ്ദേഹം വ്യക്​തമാക്കി.

ഇന്ത്യയിൽ വാക്​സിൻ ഉപയോഗം ജനുവരിയിൽ ആരംഭിക്കുമെന്ന്​ ആരോഗ്യമന്ത്രി ഹർഷവർധൻ കഴിഞ്ഞയാഴ്ച വ്യക്​തമാക്കിയിരുന്നു. ആസ്​ട്ര സെനിക്കയും ഓക്​സ്​ഫഡ്​ യൂനിവേഴ്​സിറ്റിയും സംയുക്​തമായി വികസിപ്പിച്ച വാക്​സിനാകും ഇന്ത്യയിൽ ആദ്യം എത്തുക എന്നാണ്​ സൂചന. യു.എസ്​ കമ്പനിയായ ഫൈസറും അവരുടെ വാക്​സിന്‍റെ അനുമതിക്കായി കേന്ദ്രസർക്കാറിനെ സമീപിച്ചിട്ടുണ്ട്​.