ജനന ലിംഗ അനുപാതം: ഒമ്പതു സംസ്ഥാനങ്ങൾ വിവരങ്ങൾ നൽകിയില്ല

ന്യൂഡൽഹി: ഒമ്പതു സംസ്​​ഥാനങ്ങൾ 2017ലെ ജനന ലിംഗ അനുപാതം (എസ്​.ആർ.ബി) കണ്ടെത്താൻ ​ആവശ്യമായ വിവരങ്ങൾ നൽകിയില്ലെന്ന ്​ റ​ിപ്പോർട്ട്​. ചില കേസുകളിൽ ജനനം രജിസ്​റ്റർ ചെയ്​തിട്ടില്ല. രജിസ്​റ്റർ ചെയ്​തവയിൽ വിവരങ്ങൾ പൂർണമല്ലതാനും . ഉത്തർപ്രദേശ്​, ബിഹാർ, ഹരിയാന, ഝാർഖണ്ഡ്​, മധ്യപ്രദേശ്​, മഹാരാഷ്​ട്ര, മണിപ്പൂർ, സിക്കിം, പശ്ചിമബംഗാൾ എന്നീ സംസ്​​ഥാനങ്ങളാണ്​ വിവരങ്ങൾ കൈമാറാതിരുന്നത്​.

കമ്പ്യൂട്ടർവത്​കരണത്തെക്കുറിച്ച്​ അറിവില്ലാത്തതോ ഭരണനിർവഹണത്തിലെ പാളിച്ചയോ ആകാം ഇതിനു കാരണമെന്നാണ്​ വിലയിരുത്തുന്നത്​. പൂർണമല്ലാത്ത വിവരങ്ങൾ ഒഴിവാക്കുകയായിരുന്നുവെന്ന്​ സർക്കാർ വൃത്തങ്ങൾ അറിയിച്ചു.

1000 പുരുഷന്മാർക്ക്​ ഇത്ര സ്​ത്രീകൾ എന്ന രീതിയിൽ രജിസ്​റ്റർ ചെയ്​ത സ്​ത്രീ-പുരുഷ ജനനവ്യത്യാസം സൂചിപ്പിക്കുന്നതാണ്​ എസ്​.ആർ.ബി. സാംപിൾ സർവേ വഴിയോ, ജനനരജിസ്​ട്രേഷൻ കേന്ദ്രങ്ങളി​ൽനിന്ന്​ വിവരങ്ങൾ ശേഖരിച്ചോ ആണ്​ ഇത്​ തയാറാക്കുന്നത്​. ഒരു വർഷത്തെ ശരാശരിയാണ്​ വാർഷിക ലിംഗാനുപാതമായി എടുക്കുന്നത്​.

2017ൽ ഏറ്റവും കൂടുതൽ എസ്​.ആർ.ബി അരുണാചൽപ്രദേശിലായിരുന്നു(1047). തൊട്ടുപിന്നിൽ ഛത്തിസ്​ഗഢും(968), കേരളവും(965), മിസോറമും(964) ആണ്​. ദാമൻ-ദിയുവിൽ ആണ്​ ഏറ്റവും കുറവ്​ (879). പഞ്ചാബ്​ (890), ഗുജറാത്ത്​ (898), ചണ്ഡീഗഢ്​ ​(907) എന്നിവയാണ്​ എസ്​.ആർ.ബി കുറവുള്ള മറ്റ്​ സംസ്​​ഥാനങ്ങൾ. 2016ലെ ഉയർന്ന എസ്​.ആർ.ബി 877ആയിരുന്നു.