നിസാമുദ്ദീനിൽ നിന്നും ഒഴിപ്പിച്ചവർ പ്രശ്​നമുണ്ടാക്കുന്നു; സുരക്ഷ നൽകണമെന്ന്​ ഡൽഹി ആരോഗ്യ വകുപ്പ്

ന്യൂഡൽഹി: മർകസ്​ നിസാമുദ്ദീനിൽ നിന്നും ഒഴിപ്പിച്ച ആളുകളെ പ്രവേശിപ്പിച്ച ആശുപത്രികൾക്കും ക്വാറൻറീൻ കേന്ദ്ര ങ്ങൾക്കും അധിക സുരക്ഷ ഒരുക്കണമെന്ന് ഡൽഹി സർക്കാർ പൊലീസിനോട് ആവശ്യപ്പെട്ടു. തബ്​ലീഗി ജമാഅത്തിൻെറ ആസ്ഥാനത്ത് നിന്നോ ഒഴിപ്പിച്ചവരിൽ പലരും അധികാരികളുമായി സഹകരിക്കുന്നില്ലെന്നും കൂടുതൽ സുരക്ഷ ഒരുക്കണമെന്നും ഡൽഹി ആരോഗ്യ വകുപ്പ്​ സെക്രട്ടറി പൊലീസ് കമ്മീഷണർക്ക്​ അയച്ച കത്തിൽ പറയുന്നു.

ചിലർ ക്രമസമാധാന പ്രശ്‌നങ്ങൾ സൃഷ്ടിക്കുന്നുണ്ട്​. അത്തരക്കാരെ കൈകാര്യം ചെയ്യുന്നത് മെഡിക്കൽ സ്റ്റാഫിന് വളരെ ബുദ്ധിമുട്ടാണെന്നും ആരോഗ്യവകുപ്പ്​ സെക്രട്ടറി പദ്മിനി സിംഹള പറഞ്ഞു. ക്വാറൻറീനിൽ കഴിയുന്നവരെ നിയന്ത്രിക്കാൻ കൂടുതൽ പൊലീസിനെ നിയോഗിക്കണമെന്നും അവർ ആവശ്യ​െപ്പട്ടു.

ബുധനാഴ്ച മർകസിൽ നിന്ന് രാജീവ് ഗാന്ധി സൂപ്പർ സ്പെഷ്യാലിറ്റി ആശുപത്രിയിലേക്ക് കൊണ്ടുവന്ന ഒരു രോഗി ആത്മഹത്യക്ക്​ ശ്രമിച്ചിരുന്നു. കൃത്യസമയത്ത് ആശുപത്രി ജീവനക്കാർ ഇടപെട്ടതു കൊണ്ടാണ്​ ഇയാളുടെ ജീവൻ രക്ഷിക്കാൻ കഴിഞ്ഞത്​. നരേലയിലെ ക്വാറൻറീൻ ​കേന്ദ്രത്തിൽ പാർപ്പിച്ചിരുന്ന രണ്ടുപേർ രക്ഷപ്പെടാൻ ശ്രമിച്ചതായും ഇവരെ പിന്നീട് പട്പർഗഞ്ചിൽ നിന്ന് അറസ്റ്റ് ചെയ്തതായും അവർ പറഞ്ഞു.

നിസാമുദ്ദീനിൽ നടന്ന തബ്​ലിഗ്​ ജമാഅത്ത്​ സമ്മേളനത്തിൽ പ​ങ്കെടുത്ത നിരവധി പേർക്ക്​ കോവിഡ്​ സ്ഥിരീകരിച്ചതോടെ ഇത്​ രാജ്യ​​െത്ത പ്രധാന കോവിഡ്​19 ഹോട്ട്​​സ്​പോട്ടായി മാറിയിരുന്നു. ലോക്ക്​ഡൗണിനെ തുടർന്ന്​ മർകസിൽ താമസിച്ചിരുന്ന രണ്ടായിരത്തിലധികം ആളുകളെയാണ്​ പൊലീസ്​ ഒഴിപ്പിച്ചത്​. ഇവരിൽ 500ലധികം പേരെ ആശുപത്രിയിലും മറ്റുള്ളവരെ ക്വാറൻറീൻ കേന്ദ്രങ്ങളിലും പ്രവേശിപ്പിച്ചിരുന്നു.