നിവാനോ സമാധാന പുരസ്കാരം ഗാന്ധിയൻ രാജഗോപാലിന്

ന്യൂഡൽഹി: നിവാനോ സമാധാന പുരസ്കാരം ഗാന്ധിയൻ പി.വി രാജഗോപാലിന്. പാവങ്ങൾക്കും പാർശ്വവൽകൃതർക്കും വേണ്ടി നടത്തിയ അസാധാരണ പ്രവർത്തനങ്ങൾ പരിഗണിച്ചാണ് പുരസ്കാരമെന്ന് ജപ്പാൻ കേന്ദ്രമായ നിവാനോ പീസ് ഫൗണ്ടേഷൻ വാർത്താകുറിപ്പിൽ വ്യക്തമാക്കി. മെയ് 11ന് ടോക്യോവിൽ നടക്കുന്ന ചടങ്ങിൽ മെഡലും 20 മില്യൻ യെന്നും (12.33 ലക്ഷം)അടങ്ങുന്ന അവാർഡ് സമ്മാനിക്കും.

വിവിധ മതവിഭാഗങ്ങൾക്കിടയിലുള്ള സഹകരണത്തിലൂടെ ലോക സമാധാനത്തിന് സംഭാവന ചെയ്യുന്നവരെ ആദരിക്കാൻ നൽകി വരുന്നതാണ് റിഷോ കൊ​സൈകൈ എന്ന ബുദ്ധസംഘടനയുടെ സ്ഥാപനകൻ നിക്കിയോ നിവാനോയുടെ സ്മരണക്കായി ഏർപ്പെടുത്തിയ നിവാനോ സമാധാന പുരസ്കാരം. ജാതി, ലിംഗഭേദമന്യേ എല്ലാ മനുഷ്യരുടെയും അന്തസിനും തുല്യാവകാശത്തിനും നീതിക്കും സമാധാനത്തിനും ഭൂമിയുടെ പുനർവിതരണത്തിനും വേണ്ടി രാജഗോപാൽ നടത്തിയ പ്രവർത്തനങ്ങളെ ഫൗണ്ടേഷൻ ശ്ലാഘിച്ചു.

കോഴിക്കോട് ജില്ലയിലെ രാമനാട്ടുകരയിൽ നിന്നും മധ്യപ്രദേശിലെ ആദിവാസി മേഖലകളിൽ പോയി ഗാന്ധിയൻ മാർഗത്തിലുള്ള പ്രവർത്തനങ്ങളുമായി മുന്നോട്ടുപോകുന്ന രാജഗോപാൽ ഗ്വാളിയോറിൽ നിന്ന് പതിനായിരക്കണക്കിന് ആദിവാസികളെയും കൊണ്ട് ഡൽഹി വരെ നടത്ത പദയാത്ര ഭൂമിക്ക് മേലുള്ള അവരുടെ അവകാശം സ്ഥാപിച്ചാണ് തിരിച്ചുപോയത്.