'നിവർ' അതിതീവ്ര ചുഴലിക്കാറ്റാകും; ബുധനാഴ്ച വൈകീട്ടോടെ തീരം തൊടും

ചെന്നൈ: ബംഗാൾ ഉൾക്കടലിൽ രൂപംകൊണ്ട ന്യൂനമർദം അതിതീവ്ര ചുഴലിക്കാറ്റായി മാറി ബുധനാഴ്ച വൈകീട്ടോടെ പുതുച്ചേരിയിലെ കാരക്കലിനും തമിഴ്​നാട്ടിലെ മഹാബലിപുരത്തിനും ഇടയിൽ തീരം തൊടുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. മണിക്കൂറിൽ 118 മുതൽ 166 കി.മീ വരെയാകും കാറ്റിന്‍റെ വേഗത. തമിഴ്​നാട്ടിലെ ചെന്നൈ, ചെങ്കൽ​േപ്പട്ട്​, കാഞ്ചിപുരം, മയിലാടുതുറൈ, വിഴുപ്പുറം, കടലൂർ ജില്ലകളിലും പുതുച്ചേരിയിലും ചുഴലിക്കാറ്റ്​ നാശം വിതക്കാനാണ്​ സാധ്യത.

പ്രത്യേക സാഹചര്യത്തിൽ തമിഴ്​നാട്ടിൽ പൊതുഅവധി പ്രഖ്യാപിച്ച്​ മുഖ്യമന്ത്രി എടപ്പാടി പളനിസാമി ഉത്തരവിട്ടു. ചെന്നൈയിൽനിന്ന്​ തെക്കൻ തമിഴക ജില്ലകളിലേക്കും തിരിച്ചുമുള്ള മുഴുവൻ ട്രെയിൻ സർവിസുകളും റദ്ദാക്കി. ചൊവ്വാഴ്​ച ഉച്ച മുതൽ രണ്ട​ു ദിവസത്തേക്ക്​ ബസ്​ സർവിസുകളും ഉണ്ടാവില്ല.

ചെന്നൈയിലും സമീപ ജില്ലകളിലും ചൊവ്വാഴ്​ച രാവിലെ മുതൽ മഴ പെയ്യുന്നുണ്ട്​. 27 വരെ മഴ തുടരും. തീരപ്രദേശങ്ങളിൽനിന്ന്​ ആയിരക്കണക്കിന്​ കുടുംബങ്ങളെ മാറ്റിപാർപ്പിച്ചു. സുരക്ഷ കണക്കിലെടുത്ത്​ ​ൈവദ്യുതി വിതരണം നിർത്തി. പുതുച്ചേരിയിൽ 26ന്​ രാവിലെ ആറുവരെ നിരോധനാജ്ഞ പുറപ്പെടുവിച്ചു.

അതിനിടെ സുരക്ഷാ നടപടികൾ​ ആരായുന്നതിന്​ പ്രധാനമന്ത്രി നരേന്ദ്ര മോദി തമിഴ്​നാട്​ മുഖ്യമന്ത്രി എടപ്പാടി പളനിസാമി, പുതുച്ചേരി മുഖ്യമന്ത്രി വി. നാരായണസാമി എന്നിവരെ ഫോണിൽ വിളിച്ചു.

സീസണിലെ രണ്ടാമത്തെയും ഈ വർഷത്തെ നാലാമത്തെയും ചുഴലിക്കാറ്റാണ്​ 'നിവർ'. നേര​േത്ത ​േമയ്‌ 16ന് ബംഗാൾ ഉൾക്കടലിൽ 'ആംഫൻ', ജൂൺ ഒന്നിന് അറബിക്കടലിൽ 'നിസർഗ', നവംബർ 22ന്​ അറബിക്കടലിൽ 'ഗതി' എന്നിവയാണ് ഈ വർഷം രൂപംകൊണ്ട മൂന്ന്​ ചുഴലിക്കാറ്റുകൾ.