ക്രിസ്​തുമതം സ്വീകരിച്ച ഒൻപത്​ പേരെ ഹിന്ദുവാക്കി; 'ഘർവാപസി' ചടങ്ങിൽ ബി.ജെ.പി എം.എൽ.എയുടെ അമ്മയും

ചിത്രദുർഗ: കർണാടകയിലെ ബി.ജെ.പി എം.എൽ.എയും മുൻമന്ത്രിയുമായ ഗൂലിഹട്ടി ശേഖറിന്‍റെ അമ്മയടക്കമുള്ള ക്രിസ്​തുമതത്തിലേക്ക്​ മതം മാറിയ ഒൻപത്​ പേരെ ഹിന്ദുമതത്തിലേക്ക്​ തിരികെയെത്തിച്ചു. കഴിഞ്ഞ ആഴ്ച ഹാലുരാമേശ്വര ക്ഷേത്രത്തിൽ നടന്ന പ്രത്യേക ചടങ്ങിലാണ്​ ഇവരെ വീണ്ടും ഹിന്ദുവാക്കിയത്​​.

തന്‍റെ അമ്മയടക്കമുള്ള ഒൻപത്​ പേരെ മതം മാറ്റിയത്​ നാലുവർഷം ​മുമ്പ്​ കേരളത്തിൽ വെച്ചാണെന്ന്​ ബി.ജെ.പി എം.എൽ.എ ആരോപിച്ചു. നേരത്തെയും ക്രിസ്​ത്യൻ മിഷണറിമാർ മതം മാറ്റിയെന്ന്​ ആരോപിച്ച്​ ഗൂലിഹട്ടി ശേഖർ രംഗത്ത് വന്നിരുന്നു​. തന്‍റെ അമ്മയെ ബ്രയിൻ വാഷ്​ ചെയ്​ത്​ ക്രിസ്​ത്യാനിയാക്കിയെന്നായിരുന്നു​ ഹൊസദുഗ എം.എൽ.എ കൂടിയായ ഗൂലിഹട്ടി ശേഖറി​ൈന്‍റ ആരോപണം.

''ക്രിസ്​ത്യൻ മിഷണറിമാർ ഹൊസദുർഗ നിയമസഭ മണ്ഡലത്തിൽ വ്യാപകമായി മതം മാറ്റം നടത്തുകയാണ്​. അവർ 18000 മുതൽ 20000 ഹിന്ദുക്കളെ വരെ ക്രിസ്​ത്യാനികളാക്കി. അവർ തന്‍റെ അമ്മയെ വരെ മതം മാറ്റി. അവർ ഇപ്പോൾ നെറ്റിയിൽ കുങ്കുമം ചാർത്താൻ വിസമ്മതിക്കുകയാണ്​. എന്‍റെ അമ്മയുടെ മൊബൈൽ റിങ്​ടോൺ വരെ ക്രിസ്​ത്യൻ പ്രാർഥന ഗീതമാക്കി. ഇപ്പോൾ വീട്ടിൽ പൂജ നടത്താൻ വരെ പ്രയാസമാണ്​. അമ്മയോടെന്തെങ്കിലും പറഞ്ഞാൽ അവർ ജീവിതം അവസാനിപ്പിക്കുമെന്ന്​ പറയുകയാണ്'' -ശേഖർ ആരോപിച്ചു.