ജമ്മു കശ്മീരിൽ 50 ഇടങ്ങളിൽ എൻ.ഐ.എ റെയ്ഡ്

ശ്രീനഗർ: ജമ്മു കശ്മീരിലെ 14 ജില്ലകളിലായി 50 ഇടങ്ങളിൽ എൻഐഎ റെയ്ഡ്. തീവ്രവാദ പ്രവർത്തനങ്ങൾക്ക്​ സാമ്പത്തിക സഹായം നൽകി എന്നാരോപിച്ചാണ്​ റെയ്ഡ് നടക്കുന്നത്​ എന്നാണ് സൂചന. എല്ലാ സ്​ഥലങ്ങളിലും ഒരേസമയമാണ്​ പരിശോധന.

ശ്രീനഗർ, ബുദ്ഗാം, ഗന്ദർബാൽ, ബാരാമുല്ല, കുപ്​വാര, ബന്ദിപോർ, അനന്ത്നാഗ്, ഷോപിയാൻ, പുൽവാമ, കുൽഗാം, റംബാൻ, ദോഡ, കിഷ്ത്വാർ, രജൗരി ജില്ലകളിൽ സി.ആർ.പി.എഫിന്‍റെയും പ്രാദേശിക പൊലീസിന്‍റെയും സഹായത്തോടെയാണ്​ തെരച്ചിൽ. ജമ്മു കശ്​മീർ ജമാഅത്തെ ഇസ്​ലാമി നേതാക്കൾ അടക്കമുള്ളവരുടെ വീടുകളിലും പരിശോധന തുടരുന്നുണ്ട്​.

ജൂലായ് 31 ന് 14 ഇടങ്ങളിൽ റെയ്ഡ് നടന്നിരുന്നു. തീവ്രവാദഫണ്ടിംഗുമായി ബന്ധപ്പെട്ട് 10 പേർ ഇതുവരെ അറസ്റ്റിലായതായി പൊലീസ്​ അധികൃതർ അറിയിച്ചു. കഴിഞ്ഞ ദിവസം 10 സർക്കാർ ഉദ്യോഗസ്ഥരെ ഇതിന്‍റെ ​പേരിൽ പിരിച്ചു വിട്ടിരുന്നു.