വടക്കുപടിഞ്ഞാറൻ ബംഗാൾ ഉൾക്കടലിൽ പുതിയ ചക്രവാതച്ചുഴി; ഒഡിഷയിൽ മഴ ശക്തമായേക്കും

ന്യൂഡൽഹി: വടക്കുപടിഞ്ഞാറൻ ബംഗാൾ ഉൾക്കടലിൽ പുതിയ ചക്രവാതച്ചുഴി രൂപപ്പെടുന്നതായി കേന്ദ്ര കാലാവസ്ഥ വകുപ്പ്. വടക്കുപടിഞ്ഞാറൻ ബംഗാൾ ഉൾക്കടലും അതിനോട് ചേർന്നുള്ള വടക്കൻ ഒഡീഷ-ഗംഗാനദി പശ്ചിമ ബംഗാൾ തീരങ്ങളിലുമാണ് ചക്രവാതച്ചുഴി രൂപപ്പെടുന്നതെന്നാണ് റിപ്പോർട്ട്.

വരുന്ന മൂന്ന് ദിവസത്തിനുള്ളിൽ വടക്കൻ ഒഡീഷ, പശ്ചിമ ബംഗാൾ, ജാർഖണ്ഡ് മേഖലകൾ ഉൾപ്പെടുന്ന പടിഞ്ഞാറ് - വടക്കുപടിഞ്ഞാറ് ദിശയിലേക്ക് ചക്രവാതച്ചുഴി നീങ്ങാനാണ് സാധ്യത. ചക്രവാതച്ചുഴി ശക്തി പ്രാപിക്കുന്നതിനനുസരിച്ച് ഒഡീഷയിലെ ചില പ്രദേശങ്ങളിൽ ശക്തമായ മഴക്ക് സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. ജൂലൈ 18ഓടെ വടക്കുപടിഞ്ഞാറൻ ബംഗാൾ ഉൾക്കടലിൽ പുതിയ ചക്രവാതച്ചുഴി രൂപപ്പെട്ടേക്കുമെന്നാണ് റിപ്പോർട്ട്.