'അർണബ്​ ​ഗോസ്വാമി താലിബാന്​ ഒപ്പമോ?';റിപ്പബ്ലിക്​ വിത്​ താലിബാൻ ഹാഷ്​ടാഗ്​ പറയുന്നത്​ ഇതാണ്​​

മുംബൈ: താലിബാനെപറ്റി വിവിധതരം അഭിപ്രായങ്ങൾ പ്രചരിക്കുന്ന കാലത്ത്​ ഹാഷ്​ടാഗ്​ കാരണം പുലിവാല്​ പിടിച്ച്​ ​അർണബ്​ ഗോസ്വാമിയുടെ റിപ്പബ്ലിക്​ ടി.വി. താലിബാന് പിന്തുണ അര്‍പ്പിക്കുന്ന ഹാഷ് ടാഗ് റിപ്പബ്ലിക് ടി.വി പങ്കുവെച്ചെന്നാണ് ആരോപണം. സമൂഹമാധ്യമങ്ങളിൽ ഹാഷ്​ടാഗ്​ പ്രചരിച്ചതോടെ റിപ്പബ്ലിക് ടി.വിയ്ക്കും അര്‍ണബ് ഗോസ്വാമിക്കുമെതിരെ കേസ് എടുക്കണമെന്ന് സോഷ്യല്‍ മീഡിയയില്‍ ക്യാം​െമ്പയിനും തുടങ്ങി.

താലിബാനെകുറിച്ചും അഫ്​ഗാനിസ്ഥാനെകുറിച്ചും റിപ്പബ്ലിക് ടി.വിയുടെ ഔദ്യോഗിക ട്വിറ്റര്‍ പേജില്‍ നിന്ന് പോസ്റ്റ് ചെയ്​ത വാര്‍ത്തകളില്‍ ഒന്നില്‍ 'റിപ്പബ്ലിക് വിത്​ താലിബാന്‍' എന്ന ഹാഷ് ടാഗ് ഉപയോഗിച്ചിരുന്നു. അഫ്​ഗാനിസ്​ഥാനിൽ സ്​ഥാനഭ്രഷ്​ടനാക്കപ്പെട്ട പ്രസിഡൻറ്​ അഷ്​റഫ്​ ഗനിയുടെ സഹോദരൻ ഹഷ്​മത്​ ഗനി താലിബാന്​ പിന്തുണ നൽകിയെന്ന വാർത്തയോടൊപ്പമാണ്​ 'റിപ്പബ്ലിക് വിത്ത് താലിബാന്‍' ഹാഷ് ടാഗ് റിപ്പബ്ലിക്​ ടി.വി ഉപയോഗിച്ചത്​.

ഇതിനെതിരെയാണ് സോഷ്യല്‍ മീഡിയയില്‍ പ്രതിഷേധം ശക്തമായത്. നിമിഷനേരം കൊണ്ട് ഹാഷ് ടാഗ് സമൂഹമാധ്യമങ്ങളില്‍ വൈറലായി. അസം അടക്കമുള്ള സംസ്ഥാനങ്ങളില്‍ താലിബാനെ പിന്തുണച്ചെന്നാരോപിച്ച് നിരവധി പേരെ അറസ്റ്റ് ചെയ്​തിരുന്നു. ഇപ്പോള്‍ റിപ്പബ്ലിക് ടിവി തന്നെ താലിബാനൊപ്പമാണെന്ന തരത്തില്‍ ട്വീറ്റ് ചെയ്​തിട്ടും എന്താണ് അറസ്റ്റ് നടക്കാത്തതെന്നാണ് നെറ്റിസൺസി​െൻറ ചോദ്യം.​

ചാനലും അര്‍ണബും പരസ്യമായി മാപ്പ്​ പറയണമെന്നും നിരവധി പേർ ട്വിറ്ററിലൂടെ ആവശ്യപ്പെട്ടു. വിവാദമായതിനെ തുടർന്ന്​ റിപ്പബ്ലിക്​ ടി.വി ട്വിറ്റർ പോസ്​റ്റ്​ പിന്നീട്​ ഡിലീറ്റ്​ ചെയ്​തു. 'പുൽവാമയിലെ ഭീകരാക്രമണത്തെ ആഹ്ലാദപൂർവ്വം വരവേറ്റ റിപ്പബ്ലിക്​ ചാനലിനെ സംബന്ധിച്ച്​ ഇതൊരു വലിയ കാര്യമല്ല' എന്നാണ്​ സംഭവത്തെപറ്റി ഒരാൾ ട്വിറ്ററിൽ കുറിച്ചത്​. 'പട്ടാളക്കാർക്കുനേരേ നടന്ന ഭീകരാക്രമണത്തെ പിന്തുണച്ചവൻ ഇന്ന്​ താലിബാനോടൊപ്പമാണ്​. നാളെ രാജ്യത്തിന്​ എതിരേ നടക്കുന്ന തീവ്രവാദി ആക്രമണങ്ങളേയും ഇവർ പിന്തുണക്കും'-മറ്റൊരാൾ എഴുതി.