ഇന്ത്യക്ക്​ വൈദ്യുതി വിറ്റ്​ ലാഭമുണ്ടാക്കാനൊരുങ്ങി​ നേപ്പാൾ; 39 മെഗാവാട്ട് കൈമാറും

കാഠ്​മണ്ഡു: രാജ്യത്ത് അധികമായി ഉത്​പ്പാദിപ്പിക്കുന്ന വൈദ്യുതി ഇന്ത്യയ്ക്ക് വിൽക്കുമെന്ന് നേപ്പാൾ. നേപ്പാളിന്‍റെ ആഭ്യന്തര ഊർജ വിപണി ആദ്യമായാണ് അയൽ രാജ്യത്തിന് തുറന്നുകൊടുക്കുന്നത്. ഇതുസംബമ്പന്ധിച്ച്​ ഇന്ത്യൻ ഊർജ മന്ത്രാലയത്തിൻറെ വിജ്ഞാപനം തിങ്കളാഴ്ച്ച പുറപ്പെടുവിച്ചിരുന്നു. മൊത്തം 39 മെഗാവാട്ട് വൈദ്യുതിയാണ് കൈമാറുക.

ത്രിശൂലി ഹൈട്രോപവർ ജലവൈദ്യുത പദ്ധതിയുടെ ഭാഗമായി 24 മെഗാവാട്ടും ദേവിഘട്ട് പവർഹൗസിൽ നിന്നും 15 മെഗാവാട്ടുമാണ് ആദ്യഘട്ടത്തതിൽ കൈമാറുക. ഈ രണ്ടു പവർഹൗസുകളുടെ നിർമ്മാണത്തിലും ഇന്ത്യ നേപ്പാളിനെ സഹായിച്ചിരുന്നു. ധൽകേബാർ-മുസാഫർപുർ 400 കെവി ലൈനിലൂടെയാണ് വൈദ്യുതി ഇന്ത്യയിൽ എത്തിക്കുക.

തമാകോഷി ജലവൈദ്യുതി പദ്ധതിയുടെ ഭാഗമായി 456 മെഗാവാൾട്ട് വൈദ്യുത ഉൽപ്പാദനം ആരംഭിച്ചതോടെയാണ് നേപ്പാൾ അധിക വൈദ്യുതി ഉത്​പ്പാദക രാജ്യങ്ങളുടെ പട്ടികയിൽ ഇടം നേടിയത്. വൈദ്യുതി കൂടുതൽ ആവശ്യമായി വരുന്ന രാത്രി ഏഴുമുതൽ എട്ടുവരെയുള്ള സമയത്ത് 1500 മെഗാവാട്ടാണ്​ നേപ്പാളിന്​ ആവശ്യമായി വരിക.