അതിർത്തി തർക്കം പരിഹരിക്കാനുള്ള ഏക പോംവഴി ചർച്ചകളാണെന്ന്​ ഇന്ത്യ

ന്യൂഡൽഹി: ഇന്ത്യയും ചൈനയും തമ്മിൽ അതിർത്തിയിൽ നിലനിൽക്കുന്ന തർക്കം പരിഹരിക്കാനുള്ള ഏക പോംവഴി ചർച്ചകളാണെന്ന്​ ഇന്ത്യ. അതിർത്തിയിലെ ഏകപക്ഷീയമായ ചൈനീസ്​ നടപടികൾ തുടരുന്നതിനിടെയാണ്​ ഇന്ത്യയുടെ പ്രതികരണം. അതേസമയം, അതിർത്തിയിലെ സംഘർഷങ്ങളിൽ ചൈന ഇതുവരെ പ്രതികരണം നടത്തിയിട്ടില്ല.

നയതന്ത്രതലത്തിലും സൈനികതലത്തിലും ചൈനയുമായി ഈ വിഷയം ചർച്ച ചെയ്യുമെന്ന്​ വിദേശകാര്യ മന്ത്രാലയം അറിയിച്ചു. അതിർത്തിയിലെ സ്ഥിതി ഉത്തരവാദിത്തത്തോടെ കൈകാര്യം ചെയ്യണമെന്നും ഇരുവിഭാഗവും പ്രകോപനപരമായ നടപടികളൊന്നും സ്വീകരിക്കുകയോ ചെയ്യരുതെന്നും​ രണ്ട്​ വിദേശകാര്യ മന്ത്രിമാരും പ്രത്യേക പ്രതിനിധികളും തമ്മിലുള്ള ചർച്ചയിൽ ധാരണയായിരുന്നു. ഇത്​ കുറേ മാസങ്ങളായി പാലിച്ച്​ പോന്നിരുന്നു. അത്​ തകർക്കാനുള്ള നീക്കങ്ങളാണ്​ ചൈനയുടെ ഭാഗത്ത്​ നിന്ന്​ ഉണ്ടാവുന്നതെന്നും വിദേശകാര്യമന്ത്രാലയം വക്​താവ്​ രവീഷ്​ കുമാർ പ്രതികരിച്ചു.

നേരത്തെ 118 ആപുകൾ നിരോധിച്ച ഇന്ത്യയുടെ നടപടിക്കെതിരെ ചൈന രംഗത്തെത്തിയിരുന്നു. ഇത്തരം നടപടികൾ ഇന്ത്യയിലെ ചൈനീസ് നിക്ഷേപകരുടേയും സേവനദാതാക്കളുടേയും താൽപര്യങ്ങൾ ഹനിക്കുന്നതാണെന്നും ചൈന കുറ്റപ്പെടുത്തിയിരുന്നു.