കോവിഡ് പരിശോധനയ്ക്ക് 'തൊണ്ട കഴുകിയ ലായനി'; സലൈൻ ഗാർഗ്​ൾ ആർ.ടി.-പി.സി.ആർ മാർഗം വരുന്നു

ന്യൂഡൽഹി: കോവിഡ് പരിശോധന വേഗത്തിലാക്കാൻ പുതിയ രീതി വികസിപ്പിച്ച്​ നാഗ്പുരിലെ നാഷണൽ എൻവയേൺമെന്‍റൽ എൻജിനീയറിങ് റിസർച്ച് ഇൻസ്റ്റിറ്റ്യൂട്ട് (എൻ.ഇ.ഇ.ആർ.ഐ). സ്വന്തമായി സ്രവമെടുക്കാൻ കഴിയുന്ന 'സലൈൻ ഗാർഗ്​ൾ ആർ.ടി-പി.സി.ആർ' മാർഗമാണ്​ ഇവർ വികസിപ്പിച്ചെടുത്തത്​. എളുപ്പത്തിൽ സ്രവം ശേഖരിച്ച് പരിശോധിക്കാനും മൂന്ന് മണിക്കൂറിനകം ഫലമറിയാനും പുതിയ മാർഗത്തിലൂടെ സാധിക്കുമെന്ന്​ അധികൃതർ വ്യക്​തമാക്കി.

സലൈൻ ലായനി നിറച്ച പ്രത്യേക കലക്ഷൻ ട്യൂബാണ് പരിശോധനയ്ക്കായി ഉപയോഗിക്കുന്നത്. ഇതിലെ സലൈൻ ലായനി ഒഴിച്ച്​ തൊണ്ട കഴുകിയ ശേഷം ഇതേ ട്യൂബിലേക്ക് തന്നെ ശേഖരിക്കണം. ഈ ട്യൂബ് ലാബിലെത്തിച്ച് സാധാരണ താപനിലയിൽ പ്രത്യേക ലായനിയിൽ സൂക്ഷിക്കും. പിന്നീട് ഇത് ചൂടാക്കിയ ശേഷമാണ് ആർ.ടി-പി.സി.ആർ പരിശോധന നടത്തുന്നത്.

എളുപ്പവും വേഗതയേറിയതും ചെലവ് കുറഞ്ഞതും രോഗികൾക്ക് ബുദ്ധിമുട്ടില്ലാത്തതുമാണ് പുതിയ മാർഗമെന്ന് കൗൺസിൽ ഫോർ സയന്‍റിഫിക് ആൻഡ് ഇൻഡസ്ട്രിയൽ റിസർച്ച് (സി.എസ്.ഐ.ആർ) അധികൃതർ ചൂണ്ടിക്കാട്ടി. കുറഞ്ഞ അടിസ്ഥാന സൗകര്യങ്ങളുള്ള ഗ്രാമീണ, ഗോത്ര മേഖലകൾക്ക് ഈ പരിശോധന ഏറെ പ്രയോജനകരമാകുമെന്നും അവർ വിലയിരുത്തി.

പുതിയ പരിശോധന മാർഗവുമായി മുന്നോട്ടുപോകാൻ നാഗ്പുർ മുനിസിപ്പൽ കോർപ്പറേഷൻ അനുമതി നൽകിയിട്ടുണ്ട്. ഇതിന്‍റെ അടിസ്ഥാനത്തിൽ എൻ.ഇ.ഇ.ആർ.ഐ സലൈൻ ഗാർഗ്​ൾ പരിശോധന ആരംഭിച്ചിട്ടുണ്ടെന്നും സി.എസ്.ഐ.ആർ വ്യക്തമാക്കി. കൂടുതൽ സമയം ആവശ്യമായ നിലവിലെ സ്രവ സാമ്പിൾ ശേഖരിച്ചുള്ള പരിശോധന രോഗികൾക്ക് ഉണ്ടാക്കുന്ന ബുദ്ധിമുട്ടിന്​ പുതിയ രീതി പരിഹാരമാകുമെന്നും മൂന്ന് മണിക്കൂറിനുള്ളിൽ ഫലം ലഭിക്കുമെന്നും എൻ.ഇ.ഇ.ആർ.ഐ സീനിയർ സയന്‍റിസ്റ്റ് ഡോ. കൃഷ്ണ ഖയിർനാർ പറഞ്ഞു.