പ്രതിവിധിയാണാവശ്യം, പൊള്ളയായ വാഗ്​ദാനങ്ങളല്ല; കേന്ദ്രത്തിനെതിരെ വീണ്ടും രാഹുൽ ഗാന്ധി

ന്യൂഡൽഹി: കോവിഡ്​ പ്രതിരോധത്തിലെ കേ​ന്ദ്രസർക്കാറിന്‍റെ പോരായ്​മകൾക്കെതിരെ വീണ്ടും കോൺഗ്രസ്​ നേതാവ്​ രാഹുൽ ഗാന്ധിയുടെ വിമർശനം. കോവിഡ്​ അതിവേഗം പടരുന്ന സാഹചര്യത്തിൽ അത്​ തടയാനുള്ള പ്രതിവിധിയാണാവശ്യമെന്നും പൊള്ളയായ വാഗ്​ദാനങ്ങളല്ലെന്നും രാഹുൽ ട്വീറ്റ്​ ചെയ്​തു. രാജ്യത്തെ കോവിഡ്​ പ്രതിദിന വർധന മൂന്ന്​ ലക്ഷവും കടന്ന്​ കുതിക്കുന്നതിനിടെയാണ്​ വിമർശനം.

ഞാൻ ഇപ്പോൾ വീട്ടിൽ ക്വാറന്‍റീനിലാണ്​. പക്ഷേ രാജ്യത്തെ വിവിധ ഭാഗങ്ങളിൽ നിന്നുള്ള കോവിഡ്​ ദുരന്തത്തിന്‍റെ കഥകളാണ്​ കേൾക്കുന്നത്​. ഇന്ത്യക്ക്​ മുന്നിൽ കോവിഡ്​ പ്രതിസന്ധി മാത്രമല്ല ഇപ്പോഴുള്ളത്​. ഇതി​െനാപ്പം സർക്കാറിന്‍റെ ജനവിരുദ്ധ നയങ്ങൾ കൂടി പ്രതിസന്ധി സൃഷ്​ടിക്കുകയാണ്​. കോവിഡ്​ പ്രതിസന്ധിയിൽ പ്രതിവിധിയാണാവശ്യം അല്ലാതെ പൊള്ളയായ വാഗ്​ദാനങ്ങളല്ലെന്ന്​ രാഹുൽ ട്വിറ്ററിൽ കുറിച്ചു.

കഴിഞ്ഞ ദിവസം രാജ്യത്തെ അഭിസംബോധന ചെയ്​ത പ്രധാനമന്ത്രി നരേന്ദ്ര മോദി ഓക്​സിജനും, ആശുപത്രിക്കളിൽ കിടക്കകളും മറ്റ്​ സൗകര്യങ്ങളും ഏർപ്പെടുത്തുമെന്ന്​ അറിയിച്ചിരുന്നു. എന്നാൽ, പ്രധാനമന്ത്രിയുടെ പ്രഖ്യാപനം വന്നിട്ടും ഇക്കാര്യത്തിൽ യാതൊരു പുരോഗതിയുണ്ടായിരുന്നില്ല.