പഴയ നിയമങ്ങൾ ഇ​പ്പോൾ ബാധ്യതയാണ്​; വികസനത്തിന്​ പരിഷ്​കരണം നടപ്പാക്കണമെന്ന്​ മോദി

ലഖ്​നോ: വികസനത്തിന്​ പഴയ നിയമങ്ങൾ പരിഷ്​കരിക്കണമെന്ന്​ പ്രധാനമന്ത്രി നരേന്ദ്ര മോദി. പഴയ നിയമങ്ങൾ ഇപ്പോൾ ബാധ്യതയായെന്നും അദ്ദേഹം പറഞ്ഞു. ആഗ്ര മെട്രോ റെയിൽ പദ്ധതി വിഡിയോ കോൺഫറൻസ്​ വഴി ഉദ്​ഘാടനം ചെയ്യുകയായിരുന്നു അ​ദ്ദേഹം. പുതിയ കാർഷിക നിയമങ്ങൾക്കെതിരെ രാജ്യതലസ്​ഥാനത്ത്​ കർഷകരുടെ സമരം ശക്​തമാകുന്നതിനിടെയാണ്​ പ്രധാനമന്ത്രിയുടെ പ്രസ്​താവന.

സമഗ്രമായ പരിഷ്​കാരങ്ങളാണ്​ ത​െൻറ സർക്കാർ നടപ്പാക്കുന്നത്​. നേരത്തേയിത്​ ചില മേഖലകളിലും വകുപ്പുകളിലും മാത്രമായിരുന്നു. ഇൗ മാറ്റങ്ങൾ ജനങ്ങളടെ ആത്മവിശ്വാസം വർധിപ്പിച്ചു. അത്​ തെരഞ്ഞെടുപ്പ്​ ഫലങ്ങളിൽ കാണാമെന്നും പ്രധാനമന്ത്രി അവകാശപ്പെട്ടു. കർഷക സംഘടനകൾ ചൊവ്വാഴ്​ച ഭാരത്​ ബന്ദ്​ പ്രഖ്യാപിച്ചിട്ടുണ്ടെങ്കിലും കാർഷിക ബില്ലിനെക്കുറിച്ച്​ പ്രധാനമന്ത്രി ഒന്നും പറഞ്ഞില്ല.

ജീവിതം കൂടുതൽ എളുപ്പമാക്കാനും നിക്ഷേപം വർധിപ്പിക്കാനും ആധുനിക സാ​​​ങ്കേതിക വിദ്യകൾ കൂടുതൽ പ്രയോജനപ്പെടുത്താനുമാണ്​ സർക്കാർ ശ്രമിക്കുന്നതെന്നും അദ്ദേഹം പറഞ്ഞു.

താജ്​മഹൽ, ആ​ഗ്ര കോട്ട​, സിക്കന്തറ വിനോദസഞ്ചാര കേന്ദ്രങ്ങളെ റെയിൽവേ സ്​റ്റേഷനുമായും ബസ്​ സ്​റ്റാൻറുകളുമായും ബന്ധിപ്പിക്കുന്നതാണ്​ 8379 കോടി രൂപയുടെ ആഗ്ര മെട്രോ റെയിൽ പദ്ധതി. അഞ്ച്​ വർഷം കൊണ്ട്​ പദ്ധതി യാഥാർഥ്യമാക്കാനാണ്​ ലക്ഷ്യമിടുന്നത്​.