രാജ്യത്ത്​ കോവിഡ്​ രോഗികൾ 90,000 കടന്നു; 24 മണിക്കൂറിൽ 4,987 രോഗികൾ

ന്യൂഡൽഹി: ​രോഗികളുടെ എണ്ണത്തിൽ ചൈനയെ മറികടന്നതിന്​ പിന്നാലെ ഇന്ത്യയിൽ കോവിഡ്​ രോഗികൾ 90,000 കടന്നു. കഴിഞ്ഞ 24 മണിക്കൂറിനിടെ 4,987 പേർക്കാണ്​ രോഗബാധ സ്ഥിരീകരിച്ചത്​. 2,872 പേർ കോവിഡ്​ മൂലം ഇന്ത്യയിൽ മരിക്കുകയും ചെയ്​തിട്ടുണ്ട്​. കേന്ദ്ര ആരോഗ്യമന്ത്രാലയമാണ്​ ഇതുമായി ബന്ധപ്പെട്ട കണക്കുകൾ പുറത്ത്​ വിട്ടത്​.

ഇന്ത്യയിൽ 34,000 പേർക്ക്​ രോഗം ഭേദമായിട്ടുണ്ട്​. 37.51 ശതമാനമാണ്​ രാജ്യത്തെ രോഗമുക്​തി നിരക്ക്​. മഹാരാഷ്​ട്ര, ഡൽഹി, തമിഴ്​നാട്​, ഗുജറാത്ത്​ തുടങ്ങിയ സംസ്ഥാനങ്ങളിലാണ്​ രോഗികൾ ഏറ്റവും കൂടുതൽ. 30,706 രോഗികളുമായി മഹാരാഷ്​ട്രയാണ്​ ഒന്നാം സ്ഥാനത്ത്​. പതിനായിരത്തിലധികം രോഗികളുള്ള ഗുജറാത്താണ്​ രണ്ടാം സ്ഥാനത്ത്​.

അതേസമയം, മൂന്നാം ഘട്ട ലോക്​ഡൗൺ ഞായറാഴ്​ച അവസാനിക്കാനിരിക്കെ കേന്ദ്രസർക്കാർ നാലാം ഘട്ട ലോക്​ഡൗണിനുള്ള മാർഗനിർദേശങ്ങൾ ഇന്ന്​ പുറത്തിറക്കും. രാജ്യത്തെ റെഡ്​സോൺ മേഖലകൾ ചുരുക്കിയേക്കുമെന്നാണ്​ സൂചന. 30 നഗരങ്ങളിൽ മാത്രമാവും കടുത്ത നിയന്ത്രണങ്ങൾ തുടരുക.