യു.പിയിൽ യുവരാജാക്കൻമാർക്ക്​ സംഭവിച്ചത്​ ബിഹാറിലും ആവർത്തിക്കും -മോദി

ന്യൂഡൽഹി: നാല്​ വർഷങ്ങൾക്ക്​ മുമ്പ്​ യു.പിയിൽ യുവരാജാക്കൻമാർക്ക്​ സംഭവിച്ചത്​ ബിഹാറിലും ആവർത്തിക്കുമെന്ന്​ പ്രധാനമന്ത്രി നരേന്ദ്ര​ മോദി. നാല്​ വർഷം മുമ്പ്​ അധികാരം പിടിക്കാൻ യു.പിയിൽ രണ്ട്​ യുവരാജാക്കൻമാർ കൈ കൊടുത്തു. അവരെ ജനം വീട്ടിലേക്ക്​ തിരിച്ചയച്ചുവെന്ന്​ മോദി ഓർമിപ്പിച്ചു. രാഹുൽ ഗാന്ധിയുടേയും അഖിലേഷ്​ യാദവി​േൻറയും പേര്​ പരാമർശിക്കാതെയായിരുന്നു മോദിയുടെ വിമർശനം.

ഇപ്പോൾ കാട്ടുഭരണത്തിനായി രണ്ട്​ യുവരാജാക്കൻമാർ ഒന്നിച്ചിരിക്കുകയാണ്​. ബിഹാറിലെ ജനങ്ങൾ അവരെ ചവറ്റുകുട്ടയിലേക്ക്​ വലിച്ചെറിയും. ഇരട്ട എഞ്ചിനുള്ള സർക്കാറാണ്​ ഇപ്പോൾ ബിഹാറിനെ മുന്നോട്ട്​ നയിക്കുന്നതെന്നും മോദി കൂട്ടിച്ചേർത്തു.

ഇരട്ട എഞ്ചിനുള്ള എൻ.ഡി.എ സർക്കാർ ബിഹാറി​െൻറ വികസനം നടപ്പിലാക്കാൻ പ്രതിജ്ഞാബദ്ധമാണ്​. സ്വന്തം കസേര സംരക്ഷിക്കാനാണ്​ രണ്ട്​ യുവരാജാക്കൻമാരുടെയും ശ്രമം. ബിഹാറിലെ പാവപ്പെട്ട ജനങ്ങൾക്ക്​ വേണ്ടിയാണ്​ എൻ.ഡി.എ സർക്കാർ പ്രവർത്തിക്കുന്നതെന്നും അദ്ദേഹം പറഞ്ഞു.

ബിഹാറിലെ രണ്ടാംഘട്ട വോ​ട്ടെടുപ്പിന്​ മുന്നോടിയായുള്ള തെരഞ്ഞെടുപ്പ്​ റാലികളിലാണ്​ മോദി പ​ങ്കെടുക്കുന്നത്​. ലാലു പ്രസാദ്​ യാദവി​െൻറ ശക്​തികേന്ദ്രമായ ചാപ്രയിലാണ്​ മോദിയുടെ ഇന്നത്തെ പ്രചാരണം.