213 കോടി രൂപ പിഴ: മെറ്റയുടെയും വാട്സാപ്പി​ന്റെയും അപ്പീൽ സ്വീകരിച്ചു

ന്യൂഡൽഹി: വിപണി മേധാവിത്തം ദുരുപയോഗം ചെയ്തുവെന്നാ​രോപിച്ച് കോംപറ്റീഷൻ കമീഷൻ ഓഫ് ഇന്ത്യ (സി.സി.ഐ) 213.14 കോടി രൂപ പിഴ ചുമത്തിയതിനെതിരെ ഫേസ്ബുക്കിന്റെ മാതൃസ്ഥാപനമായ മെററ പ്ലാറ്റ്ഫോംസും വാട്സാപ്പും സമർപ്പിച്ച അപ്പീൽ നാഷനൽ കമ്പനി ലോ അപ്പലേറ്റ് ട്രിബ്യൂണൽ (എൻ.സി.എൽ.എടി) സ്വീകരിച്ചു.

ഇരു കക്ഷികളുടെയും വാദങ്ങൾ കുടുതൽ പരിശോധിക്കേണ്ടതു​​ണ്ടെന്ന് ട്രിബ്യൂനൽ അധ്യക്ഷൻ ജസ്റ്റിസ് അശോക് ഭൂഷൺ പറഞ്ഞു. അതേസമയം, സി.സി.ഐ ഉത്തരവ് സ്റ്റേ ചെയ്യണമെന്ന ആവശ്യത്തിൽ തീരുമാനം ട്രൈബ്യൂണൽ മാറ്റിവെച്ചു. അടുത്തയാഴ്ച ഇക്കാര്യത്തിൽ തീരുമാനം പ്രഖ്യാപിക്കും. ഉത്തരവ് സ്റ്റേ ചെയ്യണമെന്ന മെറ്റയുടെയും വാട്സാപ്പി​െന്റയും ആവശ്യത്തെ സി.സി.ഐക്കുവേണ്ടി ഹാജരായ അഭിഭാഷകർ എതിർത്തു.

2021ൽ വാട്സാപ്പ് നടപ്പാക്കിയ സ്വകാര്യതാ നയ പരിഷ്‍കരണവുമായി ബന്ധപ്പെട്ടാണ് സി.സി.ഐ നടപടിയുണ്ടായത്. വിപണിയിലെ മത്സരം ഇല്ലാതാക്കുന്നതാണ് പരിഷ്‍കരണമെന്ന് സി.സി.ഐ കുറ്റപ്പെടുത്തിയിരുന്നു.