'നക്​സൽ മാമാ, എന്‍റെ പപ്പയെ വിട്ടയക്കണേ', ഈ കുഞ്ഞുമോളുടെ കണ്ണീർ അവർ കേൾക്കുമോ?

ശ്രീനഗർ: മാവോവാദി വേട്ടക്കി​െട പിടിയിലായെന്ന്​ സംശയിക്കുന്ന സി.ആർ.പി.എഫ്​ ജവാൻ രാകേശ്വർ സിങ്​ മൻഹാസിന്‍റെ അഞ്ചു വയസ്സുകാരി മകൾ ശ്രഗ്​വിക്ക്​ ദിവസങ്ങളായി കണ്ണീർ വറ്റിയിട്ടില്ല. ഏറെ സ്​നേഹിക്കുന്ന വത്സലനായ പിതാവ്​ ആരുടെ പിടിയിലാണെന്ന്​ അറിയില്ലെങ്കിലും വീട്ടുകാർ പറഞ്ഞുകേട്ടതനുസരിച്ച്​ അവൾക്ക്​ ഒറ്റ ആവശ്യമേയു​ള്ളൂ- നക്​സൽ മാമാ, എന്‍റെ പിതാവിനെ മോചിപ്പിക്കണേ'.

സി.ആർ.പി.എഫ്​ കോബ്ര കമാൻഡോ ആയ മൻഹാസടങ്ങിയ സംഘത്തിലെ നിരവധി പേർ ജീവൻ ബലി നൽകിയപ്പോൾ അദ്ദേഹത്തെ തട്ടിക്കൊണ്ടുപോകുകയായിരുന്നുവെന്നാണ്​ കരുതുന്നത്​. ഇതുവരെയും ഒരു വിവരവും ലഭിക്കാതായതോടെയാണ്​ സംഘട്ടനത്തിനിടെ തട്ടിക്കൊണ്ടുപോയെന്ന സംശയം ബലപ്പെട്ടത്​. മ​ാവോവാദികൾ ഇത്​ സ്​ഥിരീകരിക്കുകയോ മോചന ദ്രവ്യം ആവശ്യപ്പെടുകയോ ചെയ്​തിട്ടില്ല.

ശനിയാഴ്ചയാണ്​ 1,000 ലേറെ വരുന്ന വൻസൈനിക വിഭാഗം മാവോവാദി വേട്ടക്കായി സുക്​മ- ബിജാപൂർ അതിർത്തിയിലെ വന മേഖലയിൽ എത്തിയത്​. രഹസ്യ വിവരമനുസരിച്ചാണ്​ എത്തിയതെങ്കിലും ആരെയും കാണാതെ മടങ്ങുന്നതിന​ിടെ മാവോവാദികൾ ഒളിയാക്രമണം നടത്തുകയായിരുന്നു. ചിതറിപ്പോയ സേനയിൽ പലരും പല ഭാഗത്തായതിനാൽ വിവരങ്ങൾ പങ്കുവെക്കാൻ പോലും കഴിഞ്ഞില്ല. ഇതിനിടയിലാണ്​ നിരവധി പേർക്ക്​ ജീവൻ നഷ്​ടമായതും അതിലേറെ പേർക്ക്​ പരിക്കേൽക്കുന്നതും.

ആക്രമണം നടന്ന വിവരം പോലും ടെലിവിഷനിലാണ്​ അറിഞ്ഞതെന്നും മൻഹാസിന്‍റെ വിവരങ്ങൾ സി.ആർ.പി.എഫ്​ ഔദ്യോഗികമായി അറിയിച്ചിട്ടില്ലെന്നും ജമ്മു- അഖ്​നൂർ റോഡിലെ ബർനയിലുള്ള കുടുംബം പറയുന്നു. മൻഹാസിനെ കുറിച്ച്​ ഭാര്യ മീനുവിനും മകൾ ശ്രഗ്​വിക്കും മാത്രമല്ല, ആധി. സഹോദര പുത്രൻ ആകാശും പിന്നെ എണ്ണമറ്റ ബന്ധുക്കളും കണ്ണീരണിഞ്ഞ്​ കാത്തിരിപ്പിലാണ്​.

കാണാതായ വാർത്ത അറിഞ്ഞതുമുതൽ നാട്ടുകാരും ബന്ധുക്കളും മൻഹാസിന്‍റെ വീട്ടിലേക്ക്​ ഒഴുകുകയാണ്​.