സൈനികർക്കായി രാഷ്​ട്രം ഒറ്റക്കെട്ടായി നിൽക്കുന്നുവെന്ന സന്ദേശം നൽകും- മോദി

ന്യൂഡൽഹി: പാർല​െമൻറി​െൻറ 18 ദിന മൺസൂൺ സമ്മേളനം ആരംഭിക്കുന്നതിന്​ മുമ്പ്​ അതിർത്തിയിലെ ചൈനീസ്​ സംഘർഷവും കോവിഡ്​ പ്രതിരോധ പ്രവർത്തനങ്ങളും പരാമർശിച്ച്​ പ്രധാനമന്ത്രി നരേന്ദ്രമോദി. സമ്മേളനത്തിന് മുമ്പായി മാധ്യമങ്ങളോട്​ സംസാരിച്ച മോദി പാർല​െമൻറും എല്ലാ അംഗങ്ങളും രാഷ്​ട്രത്തിനായി സൈനികർക്കൊപ്പം നിൽക്കുന്നുവെന്ന സന്ദേശം നൽകുമെന്ന പ്രതീക്ഷയിലാണെന്ന്​ അദ്ദേഹം പറഞ്ഞു.

"നമ്മുടെ സൈനികർ അവരുടെ മാതൃരാജ്യത്തെ സംരക്ഷിക്കാൻ ധൈര്യത്തോടെ, അഭിനിവേശ​ത്തോടെ, ദൃഢനിശ്ചയത്തോടെ അതിർത്തികളിൽ നിലയുറപ്പിച്ചിരിക്കുകയാണ്​. അടുത്ത ഏതാനും ദിവസങ്ങൾക്കകം മഞ്ഞുവീഴ്ചയും സംഭവിക്കാവുന്ന പ്രയാസകരമായ ഉയരത്തിലാണ്​ അവർ നിൽക്കുന്നത്​. അതുപോലെ, പാർലമെൻറും എല്ലാ അംഗങ്ങളും ഒറ്റക്കെട്ടായി അതിർത്തിയിൽ കാവൽ നിൽക്കുന്ന സൈനികരുടെ പിന്നിൽ ഉറച്ചുനിൽക്കുന്നുവെന്ന സന്ദേശം അയക്കുമെന്ന്​ പ്രതീക്ഷിക്കുന്നു"-പ്രധാനമന്ത്രി പറഞ്ഞു.

കോവിഡ്​ മഹാമാരി മൂലം പ്രത്യേക സാഹചര്യങ്ങളിലാണ്​ സമ്മേളനം നടക്കുന്നത്​. കോവിഡ് വ്യാപനത്തിലും എം‌.പിമാർ തങ്ങളുടെ കടമ നിർവഹിക്കുകയാണ്​ ചെയ്​തതെന്നും അദ്ദേഹം പറഞ്ഞു.

മെയ് മുതലുള്ള ചൈനീസ് ആക്രമണം, യഥാർത്ഥ അതിർത്തി രേഖയിൽ ഇരുരാജ്യങ്ങളും തമ്മിൽ നിലനിൽക്കുന്ന സംഘർഷം, അതിനോടുള്ള സർക്കാർ പ്രതികരണം, കോവിഡ്​ പ്രതിരോധം തുടങ്ങിയ വിഷയങ്ങൾ 18 ദിവസത്തേക്ക്​ വെട്ടിച്ചുരുക്കിയ മൺസൂൺ സമ്മേളനത്തിൽ പ്രതിപക്ഷം ഉയർത്തുമെന്നാണ്​ പ്രതീക്ഷിക്കുന്നത്​.

ലോക്സഭയിലും രാജ്യസഭയിയിലും സാമൂഹിക അകലം പാലിച്ചാണ്​ എം.പിമാർ ഇരിക്കുക. വാരാന്ത്യ ദിനങ്ങളിലും പാർലമെൻറ്​ സമ്മേളനം നടക്കും. പരിമിതമായ സന്ദർശകരെ മാത്രമേ അനുവദിക്കൂ.