ഒന്നിനു പിറകെ ഒന്നായി അബദ്ധങ്ങൾ; ബിപ്ലബിനെ മോദി ഡൽഹിക്ക്​ വിളിപ്പിച്ചു

ഗുവാഹതി: ഒന്നിനു പിറകെ ഒന്നായി അബദ്ധങ്ങൾ എഴുന്നള്ളിച്ച്​ ബി.ജെ.പിയെ പ്രതിരോധത്തിലാക്കുന്നത്​ തുടർക്കഥയായതോടെ ത്രിപുര മുഖ്യമന്ത്രി ബിപ്ലബ്​ കുമാർ ദേബിനെ പ്രധാനമന്ത്രി നരേന്ദ്ര മോദി ഡൽഹിക്കു വിളിപ്പിച്ചു. ​

സംസ്​ഥാനത്തെ ബി​.ജെ.പി നേതൃത്വത്തിന്​ ഇടപെടാൻ കഴിയാത്തവിധം കാര്യങ്ങൾ കൈവിട്ടതോടെയാണ്​ അടിയന്തരമായി ബിപ്ലബിനോട്​ ഡൽഹിയിലെത്താൻ നിർദേശം. മുതിർന്ന നേതാക്കൾ ആവശ്യപ്പെട്ടപ്രകാരമാണ്​ നിർദേശമെന്നാണ്​ സൂചന. 

മഹാഭാരത കാലത്തുതന്നെ ഇൻറർനെറ്റും ഉപഗ്രഹ ബന്ധങ്ങളുമുണ്ടായിരുന്നുവെന്ന്​ പറഞ്ഞ്​ രണ്ടാഴ്​ച മുമ്പാണ്​ ബിപ്ലബ്​ ആദ്യ വെടി പൊട്ടിച്ചത്​. മുൻ ലോകസുന്ദരി ഡയാന ഹെയ്​ഡ​നെ വ്യക്​തിപരമായി ആക്രമിച്ച്​ വീണ്ടും കൈ ​െപാള്ളിയ ത്രിപുര മുഖ്യൻ അടുത്ത ദിവസം മെക്കാനിക്കൽ എൻജിനീയർമാർ​ ഇനി സിവിൽ സർവിസിന്​ പോകേണ്ടതില്ലെന്ന ഉപദേശവും നൽകി.

യുവാക്കൾ സർക്കാർ ജോലിക്കു കാത്തുനിൽക്കാതെ പശുക്കളെ വളർത്തുകയോ മുറുക്കാൻ കടകൾ തുറക്കുകയോ വേണമെന്നും ബിപ്ലബ്​ പറഞ്ഞു. കൂടുതൽ പറയും മുമ്പ്​ മേയ്​ രണ്ടിന്​ പ്രധാനമന്ത്രിയെ കാണണമെന്നാണ്​ നിർദേശം.