കോൺഗ്രസിൻെറ മിന്നലാക്രമണം തീവ്രവാദികൾ പോലും അറിഞ്ഞില്ല -മോദി

ജയ്​പൂർ: കോൺഗ്രസിൻെറ മിന്നലാക്രമണം തീവ്രവാദികൾ പോലും അറിഞ്ഞില്ലെന്ന്​ പ്രധാനമന്ത്രി നരേന്ദ്രമോദി. തനിക്ക്​ ലഭിക്കുന്ന അംഗീകാരങ്ങൾ കണ്ടാണ്​ കോൺഗ്രസ്​ മീ ടു മീ ടു എന്നു പറയുന്നതെന്നും അദ്ദേഹം പരിഹസിച്ചു. കോൺഗ്രസ്​ ഭരണകാലത്ത്​ ഇന്ത്യയിലെ ഒരു നഗരവും സുരക്ഷിതമായിരുന്നില്ല. എല്ലാ നഗരങ്ങളും തീവ്രവാദ ഭീഷണി നേരിട്ടിരുന്നുവെന്നും മോദി പറഞ്ഞു. രാജസ്ഥാനിലെ കരൗലിയിൽ നടന്ന റാലിയിലായിരുന്നു മോദിയുടെ പരമാർശം.

യു.പി.എ ഭരണകാലത്ത്​ മുംബൈയിൽ തീവ്രവാദികൾ എങ്ങനെയാണ്​ ആക്രമണം നടത്തിയതെന്ന്​ ഇന്ത്യ കണ്ടതാണ്​. 2008ൽ ജനുവരിയിൽ യു.പിയിലെ സി.ആർ.പി.എഫ്​ ക്യാമ്പിൽ ആക്രമണമുണ്ടായി. മേയിൽ ജയ്​പൂരിൽ ബോംബാക്രമണമുണ്ടായി. ജൂലൈയിൽ ബംഗളൂരുവിൽ സ്​ഫോടനങ്ങൾ നടന്നു. അഹമ്മദാബാദിലും ആക്രമണമുണ്ടായി. സെപ്​തംബറിൽ രണ്ടോ മൂന്നോ ആക്രമണങ്ങൾ ഡൽഹിയിൽ ഉണ്ടായി. ഒക്​ടോബറിൽ ഗുവാഹത്തി, അഗർത്തല, ഇംഫാൽ എന്നിവിടങ്ങളിലും ആക്രമണങ്ങളുണ്ടായെന്നും മോദി പറഞ്ഞു.

യു.പി.എ ഭരണകാലത്താണ്​ രാജ്യത്ത്​ ഐ.പി.എൽ രണ്ട്​ തവണ ഇന്ത്യക്ക്​ പുറത്തേക്ക്​ മാറ്റിയത്​. 2009ലും 2014ലുമായിരുന്നു അത്​. തെരഞ്ഞെടുപ്പ്​ നടക്കുന്ന വർഷങ്ങളിൽ സുരക്ഷ ഏർപ്പെടുത്താനാവില്ലെന്ന്​ വ്യക്​തമാക്കിയാണ്​ യു.പി.എ സർക്കാർ ഐ.പി.എൽ മാറ്റിയത്​. എന്നാൽ, മോദി ഭരണകാലത്ത്​ ഐ.പി.എല്ലും തെരഞ്ഞെടുപ്പ്​ ഒരുമിച്ച്​ നടക്കുകയാണെന്നും പ്രധാനമന്ത്രി പറഞ്ഞു.