രാജ്യത്ത്​ തൊഴിലവസരങ്ങൾ കൂടി; സമ്പദ്​വ്യവസ്ഥ മെച്ചപ്പെട്ടു -മോദി

ന്യൂഡൽഹി: എൻ.ഡി.എ സർക്കാർ അധികാരത്തിലെത്തിയതിന്​ ശേഷം രാജ്യത്ത്​ തൊഴിലവസരങ്ങൾ കൂടിയെന്ന്​ പ്രധാനമന്ത്രി നര േന്ദ്രമോദി. ഒാരോ വർഷവും 1.25 കോടി ആളുകൾ പുതുതായി തൊഴിൽ മേഖലയിലേക്ക്​ എത്തുന്നു​വെന്നാണ്​ ഇ.പി.എഫ്​.ഒ കണക്കുകൾ വ്യക്​തമാക്കുന്നത്​. മുദ്ര പദ്ധതി പ്രകാരം 4.25-4.50 കോടി ജനങ്ങൾക്ക്​ വരെ ബാങ്ക്​ വായ്​പ ലഭിച്ചുവെന്നും മോദി അവകാശപ്പെട്ടു. റോഡ്​, റെയിൽ വികസന പ്രവർത്തനങ്ങൾ തൊഴിലാളികളില്ലാതെ എങ്ങനെ നടക്കുമെന്നും മോദി ചോദിച്ചു. ഇന്ത്യ ടുഡേക്ക്​ നൽകിയ അഭിമുഖത്തിലാണ്​ മോദിയുടെ പ്രതികരണം.

നോട്ട്​ നിരോധനം മൂലം രാജ്യത്തെ പണപ്പെരുപ്പം നിയന്ത്രിക്കാൻ സാധിച്ചിട്ടുണ്ടെന്ന്​ മോദി പറയുന്നു​. യു.പി.എ സർക്കാറിൻെറ ഭരണകാലത്ത്​ ഉയർന്ന പണപ്പെരുപ്പം സമ്പദ്​വ്യവസ്ഥക്ക്​ വെല്ലുവിളി ഉയർത്തിയിരുന്നു. എന്നാൽ, എൻ.ഡി.എ സർക്കാറിന്​ ഇത്​ നിയന്ത്രിക്കാൻ സാധിച്ചു. എൻ.ഡി.എ സർക്കാറിൻെറ വികസനമാതൃക കൃത്യമാണ്​. ഇന്ത്യയുടെ അടിസ്ഥാന സൗകര്യ വികസനമേഖലയെ ലോകനിലവാരത്തിലേക്ക്​ എത്തിക്കുകയാണ്​ സർക്കാറിൻെറ ലക്ഷ്യമെന്നും മോദി വ്യക്​തമാക്കി.

നോട്ട്​ നിരോധനം മൂലം രാജ്യത്തിൻെറ നികുതി വരുമാനം 70 വർഷത്തിനിടയിലെ ഏറ്റവും ഉയർന്ന നിലവാരത്തിലേക്ക്​ എത്തിയ​തായും മോദി അവകാശപ്പെട്ടു. രാജ്യസുരക്ഷയെ കുറിച്ച്​ മാത്രമാണല്ലോ താങ്കൾ കൂടുതലായി സംസാരിക്കുന്നതെന്ന ചോദ്യത്തിന്​ അതിന് പ്രാധാന്യം നൽകേണ്ട എന്നായിരുന്നു മോദിയുടെ ഉത്തരം. 40 മിനിട്ട്​ നീണ്ടുനിൽക്കുന്ന തൻെറ പ്രസംഗങ്ങളിൽ നാല്​ മിനിട്ട്​ മാത്രമാണ്​ രാജ്യസുരക്ഷയെ കുറിച്ച്​ പറയുന്നത്​. ലോകരാജ്യങ്ങൾ നേരിടുന്ന ഏറ്റവും വലിയ പ്രതിസന്ധിയാണ്​ തീവ്രവാദം. ഈസ്​റ്റർ ദിനത്തിൽ ശ്രീലങ്കയിലുണ്ടായ സ്​ഫോടനം ഇതിലേക്കാണ്​ വിരൽ ചൂണ്ടുന്നതെന്നും മോദി പറഞ്ഞു​. കോൺഗ്രസ്​ എന്തുകൊണ്ട്​ ദേശീയ സുരക്ഷയെ കുറിച്ച്​ സംസാരിക്കുന്നില്ലെന്നും അദ്ദേഹം ചോദിച്ചു.