നരസിംഹ റാവു രാജ്യത്തെ സാമ്പത്തിക പരിഷ്​കരണങ്ങളുടെ പിതാവെന്ന്​ മൻമോഹൻസിങ്​

ന്യൂഡൽഹി: മുൻ പ്രധാനമന്ത്രി​ നരസിംഹ റാവുവിനെ രാജ്യത്തി​​െൻറ സാമ്പത്തിക പരിഷ്​കരണത്തി​​െൻറ പിതാവെന്ന്​ വിശേഷിപ്പിച്ച്​ മൻമോഹൻ സിങ്​. തെലങ്കാന കോൺഗ്രസ്​ കമ്മിറ്റിയുടെ ആഭിമുഖ്യത്തിൽ നടന്ന നരസിംഹ റാവു ജന്മ ശതാബ്​ദി​ ആഘോഷം ഉദ്​ഘാടനം ചെയ്​ത്​ സംസാരിക്കവെയാണ്​ മുൻപ്രധാനമന്ത്രി​ ഇങ്ങനെ അഭി​പ്രായപ്പെട്ടത്​. 

രാജ്യത്തി​​െൻറ മഹനീയ പുത്രനായിരുന്നു നരസിംഹ റാവു. സാമ്പത്തിക പരിഷ്​കരണം മുന്നോട്ട​ുകൊണ്ടുപോകാനുള്ള കാഴ്​ചപ്പാടും ധൈര്യവും അദ്ദേഹത്തിന്​​​ ഉണ്ടായിരു​ന്നുവെന്നും മൻ​േമാഹൻ സിങ്​ പറഞ്ഞു. നരസിംഹ റാവു മന്ത്രിസഭയിൽ ധനകാര്യമന്ത്രിയുമായിരുന്നു മൻമോഹൻ സിങ്​. 

ആധുനിക ഇന്ത്യക്ക്​ അടിത്തറ പാകുകയും രാജ്യത്ത്​ സാമ്പത്തിക പരിഷ്​കരണത്തിന്​ പാതയൊരുക്കുകയും ചെയ്​തതായിരുന്നു 1991ലെ ബജറ്റെന്ന്​ പലരും പ്രശംസിക്കുന്നുണ്ട്​. സാമ്പത്തിക പരിഷ്​കരണത്തിലൂടെയും ഉദാരവത്​ക്കരണത്തിലൂടെയും അന്നത്തെ ബജറ്റ്​ ഇന്ത്യയെ പല വിധത്തിലും മാറ്റിമറിച്ചു. രാജീവ്​ ഗാന്ധിയുടെ ഓർമക്ക്​ മുമ്പിലായിരുന്നു അന്ന്​ ബജറ്റ്​ സമർപ്പിച്ചതെന്നും മൻമോഹൻ സിങ്​ സ്​മരിച്ചു.

ഇന്ത്യൻ സമ്പദ്​വ്യവസ്ഥ അന്ന്​ നേരിടുന്ന ബുദ്ധിമുട്ടുകൾ പൂർണമായും മനസിലാക്കിയ നരസിംഹ റാവു തുടർന്ന്​ കാര്യങ്ങൾ തീരുമാനിക്കുവാനുള്ള പരിപൂർണ സ്വാതന്ത്ര്യം തനിക്കു നൽകി.​ ശക്തമായ തീരുമാനമായിരുന്നു അ​െതന്നും മൻമോഹൻ സിങ്​ വ്യക്തമാക്കി.

പുറത്തു നിന്നുള്ള പിന്തുണ കൊണ്ട്​ നിലനിന്ന ന്യൂനപക്ഷ സർക്കാറായിരുന്നു 1991ലേത്​. വിദേശ വിനിമയ പ്രതിസന്ധി നിലനിന്ന അക്കാലത്ത്​ കടുത്ത തീരുമാനങ്ങൾ എടുക്കേണ്ടിയിരുന്നു. വെല്ലുവിളി നിറഞ്ഞ സാഹചര്യത്തിൽ ഒരാൾക്ക്​ കടുത്ത തീരുമാനങ്ങൾ എടുക്കുക സാധ്യമാണോ എന്നത്​ രാഷ്​ട്രീയമായി വലിയൊരു ചോദ്യമായിരുന്നു. എന്നിട്ടും നരസിംഹറാവുവിന്​ എല്ലാവരേയും ഒരുമിച്ചുകൊണ്ടു പോകാനും കാര്യങ്ങൾ ബോധ്യപ്പെടുത്താനും സാധിച്ചുവെന്നും മൻമോഹൻ സിങ്​ പറഞ്ഞു.