50 വർഷമായി ലഭിച്ച സ്വർണമടക്കമുള്ള മുഴുവൻ സംഭാവനകളുമുപയോഗിച്ച്​ മെഡിക്കൽ കോളജും ആശുപത്രിയും പണിയുമെന്ന്​​ സിഖ്​ ഗുരു​ദ്വാര

ഓറംഗാബാദ്​: കോവിഡിൽ രാജ്യം വലയുന്ന കാലത്ത്​ മാതൃകപരമായ തീരുമാനവുമായി നന്ദഡിലെ സച്​ കങ്​ ഹസൂർ സാഹിബ്​ ഗുരുദ്വാര. കഴിഞ്ഞ 50 വർഷമായി ഗുരുദ്വാരക്ക്​ ലഭിച്ച സ്വർണമടക്കമുള്ള മുഴുവൻ സംഭാവനകളും സൂപ്പർ സ്​പ്യഷ്യാലിറ്റി ആശുപത്രി, മെഡിക്കൽ കോളജ്​ എന്നിവ നിർമിക്കാനായി നൽകുമെന്നാണ്​ പുറത്തുവരുന്ന വിവരം.

ഗുരുദ്വാരയിലെ മുതിർന്ന പുരോഹിതൻ കുൽവന്ത്​ സിങാണ്​ (ബാബാജി) നിർദേശം മുന്നോട്ടുവെച്ചത്​. ​ബോർഡിൻറ അംഗീകാരം കൂടി ലഭിച്ചാൽ നടപടികൾ ആരംഭിക്കുമെന്ന്​ ടൈംസ്​ ഓഫ്​ ഇന്ത്യ റിപ്പോർട്ട്​ ചെയ്​തു. ബാബാജി മുംബൈയിൽ കഴിഞ്ഞ വർഷം ചികിത്സയിൽ കഴിഞ്ഞപ്പോഴാണ്​ ഇത്തരമൊരാശയം ഉദിച്ചതെന്നാണ്​ വിശദീകരണം.

നന്ദഡിലോ ഓറംഗാബാദിലോ ആകും ആശുപത്രി സ്ഥാപിക്കുക. ഇതുവഴി വിദഗ്​ധ ചികിത്സക്കായി ഹൈദരാബാദിലേക്കും മുംബൈയിലേക്കും പോകുന്ന ആളുകളുടെ ബുദ്ധിമുട്ട്​ പരിഹരിക്കാനാകും. ക്രിക്കറ്റ്​ താരം ഹർഭജൻ സിങ്​ അടക്കമുള്ള നിരവധി പേർ തീരുമാനത്തെ അഭിനന്ദിച്ച്​ രംഗത്തെത്തി.