'നമോ പറഞ്ഞത്​ ശരിയാണ്​, പെട്രോൾ വില വർധനവ്​ സർക്കാറിൻെറ പരാജയത്തിന്​ ഉദാഹരണം'; മോദിയെ ട്രോളി തരൂർ

ന്യൂഡൽഹി: പെട്രോൾ വില വർധനവിൽ കേന്ദ്ര സർക്കാറിനെ വിമർശിച്ച്​ കോൺഗ്രസ്​ നേതാവും എം.പിയുമായ ശശി തരൂർ. 2012ൽ ഗുജറാത്ത്​ മുഖ്യമന്ത്രിയായിരിക്കെ നരേന്ദ്ര മോദി പെട്രോൾ വിലവർധനവിനെതിരെ കുറിച്ച ട്വീറ്റ്​ പങ്കുവെച്ചാണ്​ ശശി തരൂർ മോദിയെ ട്രോളിയത്​.

'നമോ ശരിയായിരുന്നു. സർക്കാറിൻെറ പരാജയത്തിന്​ പ്രധാന ഉദാഹരണമാണ് പെട്രോൾ വിലയിലെ വൻ വർധനവ്. യു.പി.‌എ സർക്കാറിൻെറ കാലത്ത്​ ബാരലിന് 140 ഡോളറായിരുന്നു വില. എന്നാൽ, ബി.ജെ.പി ഭരിക്കു​േമ്പാൾ മൂന്നിലൊന്ന്​ മാത്രമാണുള്ളത്​. സാമ്പത്തിക ദുരുപയോഗവും അനിയന്ത്രിത നികുതി വർധനയുമാണ്​ ഇതിന് കാരണം' -ശശി തരൂർ ട്വിറ്ററിൽ കുറിച്ചു.

'പെട്രോൾ വിലയിലെ വൻവർധനവ് കോൺഗ്രസിൻെറ നേതൃത്വത്തിലുള്ള യു.പി.എ സർക്കാറിൻെറ പരാജയത്തിൻെറ പ്രധാന ഉദാഹരണമാണ്. ഇത് ഗുജറാത്തിന്​ നൂറുകണക്കിന് കോടിയുടെ അധികഭാരം നൽകും' -എന്നായിരുന്നു 2012ൽ മോദി ട്വീറ്റ്​ ചെയ്​തത്​.

വൻ നികുതിയിലൂടെയും സബ്​സിഡി ഒഴിവാക്കിയും കേ​ന്ദ്രസർക്കാറും വില വർധിപ്പിച്ച്​ എണ്ണക്കമ്പനികളും ഇതിനകം നേടിയത്​ കോടികളുടെ കൊള്ളലാഭമാണ്​. അന്താരാഷ്​ട്ര വിപണിയിൽ അസംസ്​കൃത എണ്ണവില സമീപകാലത്തെ കുറഞ്ഞ നിലയിലാണുള്ളത്​. എന്നിട്ടും സാധാരണക്കാരുടെ നടുവൊടിച്ച്​ ഇന്ധനവില കുതിക്കുകയാണ്​.

രാജ്യത്തി​െൻറ ശ്രദ്ധയാകർഷിച്ച്​ കർഷകസമരവും സംസ്ഥാനത്ത്​ തദ്ദേശതെരഞ്ഞെടുപ്പും സജീവമായിരിക്കെ വലിയ ചർച്ചകൾക്കും പ്രതിഷേധത്തിനുമിടനൽകാതെയാണ്​ ഇന്ധനവിലയുടെ മറവിലെ കൊള്ള. ഭോപ്പാലിൽ 91.59, ഡൽഹിയിൽ 83.71, മുംബൈയിൽ 90.34, ചെന്നൈയിൽ 86.51, കൊൽക്കത്തയിൽ 85.19 എന്നിങ്ങനെയാണ്​ നിലവിൽ പെട്രോളിന്​ ഈടാക്കുന്നത്​.