ബൽഖീസ് ബാനു ഈദിയുടെ മരണത്തിൽ അനുശോചിച്ച് മോദി

ന്യൂഡൽഹി: മനുഷ്യസ്‌നേഹിയായ ഭർത്താവ് പരേതനായ അബ്ദുൾ സത്താർ ഈദിയ്‌ക്കൊപ്പം പ്രവർത്തിച്ചിരുന്ന പാകിസ്താൻ മനുഷ്യാവകാശ പ്രവർത്തക ബിൽഖീസ് ബാനു ഈദിയുടെ മരണത്തിൽ പ്രധാനമന്ത്രി നരേന്ദ്ര മോദി ശനിയാഴ്ച അനുശോചനം രേഖപ്പെടുത്തി.

"മാനുഷിക പ്രവർത്തനങ്ങൾക്കുള്ള അവരുടെ ആജീവനാന്ത സമർപ്പണം ലോകമെമ്പാടുമുള്ള ആളുകളുടെ ജീവിതത്തെ സ്പർശിച്ചു" -പ്രധാനമന്ത്രി മോദി ട്വീറ്റ് ചെയ്തു. വെള്ളിയാഴ്ച കറാച്ചിയിലെ സ്വകാര്യ ആശുപത്രിയിലായിരുന്നു ബിൽഖീസ് ബാനു ഈദിയുടെ അന്ത്യം. 74 വയസ്സായിരുന്നു.

നിരവധി മേഖലകളിലെ മാനുഷിക പ്രവർത്തനങ്ങൾക്ക് ലോകമെമ്പാടും പ്രശസ്തി നേടിയ വെൽഫെയർ ഓർഗനൈസേഷനായ അബ്ദുൽ സത്താർ ഈദി ഫൗണ്ടേഷൻ സ്ഥാപിക്കുന്നതിൽ ബിൽഖീസ് ഭർത്താവിനൊപ്പം തോളോട് തോൾ ചേർന്ന് പ്രവർത്തിച്ചു.